Утре истекува рокот во кој Советот на јавните обвинители треба да даде мислење по предлогот на Владата за разрешување на Коцевски, иако, ако се земе предвид развојот на настаните што се случија во меѓувреме, тоа нема да има влијание на постапката, која Владата реши да ја запре по трагедијата во Кочани во која загинаа 59 лица
По две одложувања, Советот на јавните обвинители денеска треба да ја одржи седницата на чиј дневен ред е разгледување на предлогот на Владата за разрешување на државниот јавен обвинител Љупчо Коцевски.
Седницата првично беше закажана на 18 март, но беше одложена поради седумдневната жалост по трагедијата во Кочани, а членовите на Советот не заседаваа ниту на 26 март. Причина за второто одлагање беше немањето кворум бидејќи, како што информираше претседателката Советот, Душица Димитриеска, тогаш отсутни биле тројца членови.
Утре истекува рокот во кој Советот на јавните обвинители треба да даде мислење по предлогот на Владата за разрешување на Коцевски, иако, ако се земе предвид развојот на настаните што се случија во меѓувреме, тоа нема да има влијание на постапката, која Владата реши да ја запре по трагедијата во Кочани во која загинаа 59 лица.
Имено, минатата недела, односно на 25 март, премиерот Христијан Мицкоски рече дека постапката, која беше иницирана од Владата во февруари треба да остане во фазата во која се наоѓа во моментов, поради истрагата за пожарот т.н. кабаре во Кочани на која работи тим од 11 обвинители.
Како што кажа тој, на обвинителите кои работат на случајот треба „да им се даде шанса да работат и да сработат“. Рече и дека заедничката работа на Јавното обвинителство и Министерството за внатрешни работи (МВР) во рамки на истрагата за трагедијата во Кочани резултира со 34 обезбедени лица.
Веќе следниот ден, кога случајно или не беше одложена седницата на Советот на јавните обвинители поради немање кворум, владината портпаролка Марија Митева на прес-конференција, соопшти дека Владата ќе ја прекине постапката за разрешување на државниот јавен обвинител Љупчо Коцевски дури и доколку добие мислење од Советот на јавни обвинители во врска со предложеното разрешување.
Тоа, како што појасни таа, значи дека дури и да го добие мислењето од Советот на ЈО, Владата нема да го испрати до Собранието на понатамошно одлучување.
„Она на што се однесуваше дека како Влада ќе ја прекинеме постапката се однесува на делот што Владата потоа, по добиеното мислење од Советот на јавни обвинители треба да го испрати таквото мислење до Собранието. Во овој контекст, сакам да појаснам дека Владата и доколку добие мислење од страна на Советот за јавни обвинители ќе ја сопре постапката, односно нема да го испрати до Собранието“,
изјави Митева на 26 март.
Прашана во врска со најавата за запирање на постапката за разрешување на Коцевски, претседателката Советот на јавните обвинители дента изјави дека немаат добиено никаков допис од Владата со известување за ваква одлука.
Постапката за разрешување на државниот јавен обвинител Љупчо Коцевски беше иницирана од Владата во февруари годинава, точно една година откако тој дојде на оваа позиција. Откако помина на владина седница, предлогот за разрешување на 4 март пристигна во Советот на јавните обвинители.
Два дена подоцна, односно на 6 март, од Јавното обвинителство на Република Северна Македонија соопштија дека Коцевски го добил предлогот за негово разрешување и дека ќе се произнесе по него.
Советот на јавните обвинители, според Законот за јавно обвинителство има рок од 15 дена да одлучи дали ќе даде позитивно или негативно мислење во однос на предлогот за разрешување на државниот јавен обвинител. Имајќи предвид дека овој рок е истечен, сега Советот ги „користи“ вторите 15 дена, кои му ги овозможува Законот, доколку затоа има оправдани причини.
Според членот 88 од Законот за јавно обвинителство, ако и во овој рок Советот на јавни обвинители не достави мислење, се смета дека не го поддржува предлогот на Владата на разрешување на државниот јавен обвинител.
Коцевски за државен јавен обвинител беше избран пред една година, со мандат од шест години.
Постапувајќи по заклучокот од 50. Седница на Владата, предлог-мислењето за негово разрешување го изготви Министерството за правда, од каде наведоа дека Коцевски постапувал во предмети во кои согласно законските одредби постоеле околности кои предизвикуваат сомневање во неговата непристрасност, како и судир на интереси, а за кои околности тој требало да знае и требало да се изземе. Републичкиот обвинител Коцевски, во неговите јавни настапи ги негираше ваквите тврдења, посочувајќи дека во неговото работење постапувал исклучиво согласно законот.