Во Основниот кривичен суд во Скопје утрово беше соопштена пресудата за случајот „Титаник 3“, кој го отвори СЈО. Со пресудата двајцата обвинети во предметот од редовите на ДУИ, Исмет Гури и Ејуп Алими, добија по 3 години и 6 месеци затвор.
Пресудата е првостепена и странките имаат право на жалба до Апелацискиот суд во Скопје.
Тие се товарат за изборни нерегуларности, за уништување изборен материјал на локалните избори во Чаир во 2013 година, односно дека направиле нерегуларности по завршувањето на гласањето, меѓу кои и преправање на бројот на добиените гласови во записниците. Во тоа време Гури бил секретар на Општинската изборна комисија во Чаир.
Судењето за предметот траеше околу две години, случајот беше враќан на почеток откако главната судијка која постапуваше, Оља Ристова, бараше изземање. Сега судењето го води судијката Марија Клетничка.
Како обвинители во овој предмет настапуваа Фатиме Фетаи и Гаврил Бубевски.
Ова е прва пресуда за некој поранешни или актуелни функционери од редовите на ДУИ во предметите на СЈО.