На самитот во Загреб имаме амбиција и јасна цел – да се почнат преговори со С.Македонија и со Албанија пред мај, изјави денеска хрватскиот премиер Андреј Пленковиќ.
„Ние ќе инсистираме на тоа. Ние одиме амбициозно кон самитот во Загреб, со јасна цел да почнат преговори со С.Македонија и Албанија пред мај“, истакна Пленковиќ.
Според него, искуството на Хрватска зборува дека кога се преговара не се гледа веднаш следниот чекор – економско управување, што во моментов не е доволно видливо во преговорите за пристапување.
Хрватскиот премиер потенцира дека од Самитот ЕУ-Западен Балкан во Загреб следниот мај има желба за испраќање на две важни пораки – да се направат состаноците на самитот да бидат „системски“ и да се направи се методологијата за пристапување во Унијата да биде појасна и со поголем поттик за земјите-кандидатки.
Пленковиќ, исто така, се залага за „системски дијалог“ на ниво на шефови на држави и влади, потсетувајќи дека „од самитот во Загреб во 2000 година и потоа во Солун во 2003 година следуваше 15 години пауза – до 2018 година и самитот во Софија и сега во Загреб во 2020 година“.
„Сакаме барем секои две години да бидеме во полн состав – членки на Унијата и земјите кандидати. Ова е многу важно од политички аспект, затоа што тука доаѓа поттикот за чекори напред, кон реформите и европска перспектива“, рече Пленковиќ.
На прашањето, каков модел на проширување фаворизира, Пленковиќ одговори дека тоа е „хрватскиот модел“, односно според член 49 од Договорот на ЕУ, врз основа на кој сите европски земји можат да станат членки.