Претседателот на Собранието истакнал дека посетата на претседателката на ЕК ја разбира како поддршка и афирмација на цврстата определба на државата да остане на европскиот пат
Европската Унија (ЕУ) за Северна Македонија не е само политички и економски блок, туку претставува посветеност на вредностите како демократијата, владеењето на правото, човековите права и солидарноста.
Ова го истакнал претседателот на Собранието, Африм Гаши, на средбата со претседателката на Европската комисија (ЕК), Урсула фон дер Лајен, која со денешната официјална посета на Скопје ја заокружува нејзината тридневна турнеја низ земјите од регионот на Западен Балкан.
Гаши, како што соопшти собраниската служба за односи со јавност, рекол дека посетата на Фон дер Лајен ја разбира како поддршка и афирмација на цврстата определба на државата да остане на европскиот пат.
Тој истакнал и дека кога земјата се соочувала со најголемите предизвици, граѓаните не се поколебале во однос на членството во Европската Унија.
„(Гаши) нагласи дека слоганот на ЕУ – ‘Обединети во различностите’ најдобро ја опишува Северна Македонија, а изрази и благодарност за Планот за раст на ЕУ за Западен Балкан, кој ветува значително подобрување на економскиот и социјалниот развој на државите во регионот и нивна поголема интеграција во ЕУ“,
се наведува во соопштението од Секторот за комуникации и односи со јавност на Собранието.
Претседателката на Европската комисија, Урсула фон дер Лајен, по средбата со премиерот Христијан Мицкоски порача дека С Македонија мора да ги направи договорените промени во Уставот за да го продолжи својот евроинтегративен пат.
„Ние целосно ја поддржуваме Северна Македонија на нејзиниот пат кон ЕУ. Можете да сметате на нас. Следниот и единствен чекор пред почетокот на преговорите е јасен. Треба да ја направите договорената уставна промена. Топката е во вашиот двор. ЕУ е подготвена“,
напиша Фон дер Лајен на Икс.
Во меѓувреме, вели таа, ЕУ продолжува со приближувањето на земјава кон Брисел преку Планот за раст.
Таа уште еднаш ја потврди најавата дека во Скопје се отвора фабрика за вештачка интелигенција, дека земјава се вклучува во Единствената платежна зона на Европа, како и дека Северна Македонија од ЕУ добива 16 милиони евра, благодарение на направените реформи.
Премиерот Мицкоски на средбата со претседателката на ЕК посочил дека државата очекува од Европската Унија јасна и конкретна посветеност, како потврда на европската перспектива и „поддршка за граѓаните кои со децении остануваат посветени на европските вредности“, соопштија од Владата.
Земјава сè уште ги нема отворено поглавјата од пристапните преговори со Европската Унија бидејќи условот за тоа е вклучувањето на бугарската заедница во Преамбулата на Уставот.
Актуелната влада, предводена од ВМРО-ДПМНЕ, не се согласува уставните измени да бидат направени без претходно земјава да добие гаранции од Брисел дека нема да има други услови и вето од Бугарија на понатамошниот пат на Македонија кон ЕУ.
Министерот за европски прашања Орхан Муртезани неодамна изјави дека кај премиерот и Владата постои сериозна одлучност и заинтересираност по завршувањето на локалните избори да се преземат конкретни чекори за надминување на спорот со Бугарија.