Заев и Филипче се вмешани во последниот случај со заплена на марихуана, кажа Петрушевски
Јавувањето на Заев во јавноста е директно погодување во центар и изблик на нервоза, затоа што се фатени директно на лице место, „во медот“, вели пратеникот на ВМРО-ДПМНЕ Бране Петрушевски, по најавата на поранешниот премиер Зоран Заев дека ќе го тужи ако не добие јавно извинување. Петрушевски на денешната прес-конференција обвини дека Заев и Филипче се вмешани во последниот случај со заплена на марихуана.
„Околу 70 проценти од запленетата дрога е на фирма која е во сопственост на кадар од СДС, поточно човек близок на Заев. Дополнително само во текот на вчерашниот ден во струмичко беа запленети околу 30 тони дрога. Кое е лицето и фирмата поврзани со СДС? Станува збор за фирмата „ЦБД Медплант“ во сопственост на Тони Котев познат како М’гчев кој е поранешен претседател на општинскиот одбор на СДС во Ново село. Поточно формалната сопственост на фирмата е кај неговиот син Христијан Котев. М’гчев е исто така познат како личност чии бизниси се поврзани со Вице Заев. Фирмата на М’гчев кон скопската фабрика каде стартуваше полициската акција за период помал од шест месеци во 2025 година има испорачано 19 тони марихуана што е познато според документи“,
кажа Петрушевски.
Одобрението за работа на фирмата, како што рече тој, било добиено во 2020 година, во време кога Заев беше премиер.
„ВМРО-ДПМНЕ и тогаш укажуваше дека лиценците за ваков вид на фирми кои одгледуваат марихуана за медицински цели се добиваа само ако некој е близок со Заев, а не ако исполнува услови пропишани во правните акти. Или освен фирмата на синот на М’гчев, дозвола за работа тогаш доби и фирмата во сопственост на синот на Боро Малборо. Оттука, апелелираме до јавното обвинителство да ја истражи и поврзаноста на Заев и Филипче со фирмата каде е запленета марихуаната“,
додаде Петрушевски.
Петрушевски обвини и дека Заев лично се интересирал и се јавувал во државни институции интересирајќи се за случајот со петте тони марихуана запленети во Србија.
Претходно, поранешниот премиер Зоран Заев реагираше на обвинувањата на владејачката ВМРО-ДПМНЕ и најави тужба ако не му се извинат , за како што рече, лагите, клеветите и злоупотребата на неговото име во „режирана драма“околу конфискацијата на десетици тони медицински канабис, поради наводно несоодветно чување и складирање.