Петровска потенцира дека на неформалните собирачи на отпадот треба да им се обезбедат лични документи и живеалиште и потоа да се вклучат во формалното селектирање и компостирање на отпадот на претоварната станица
Независната кандидатка за градоначалничка од иницијативата Зелен Хуман Град, Ана Петровска, вели дека проблемот со поранешната депонија Вардариште како жежок костен градоначалниците си го префрлаат веќе 25 години, а решението, според неа, се состои од неколку фази.
Според кандидатката, првото нешто кое треба да се направи е да се огради ѓубриштето и да се постават рампи на пристапите до него. Во меѓувреме, според решението кое го нуди Петровска, треба да се изработи техничка документација и да се обезбедат пари за санација и рекултивација, како и да се отпочне со градежните работи.
Со оглед дека неформалните собирачи на отпадот се социјално ранливи лица без лични карти кои живеат од отпадот што го наоѓаат, Петровска потенцира дека на овие луѓе треба да им се обезбедат лични документи и живеалиште, а потоа и да се вклучат во формалното селектирање и компостирање на отпадот на претоварната станица.