Најчесто целта на хибридните војни или сајбер напади е практично да се дојде до пореметување на општественото живеење што впрочем и се случува кога има зачестени напади. Целта е да се предизвика паѓање на Владите, најчесто оние кои се западно ориентирани, вели министерката за одбрана
Кога зборуваме за сајбер нападите во суштина треба да зборуваме отворено и да кажеме дека тие се дел од една голема хибридна војна која и се случува и на Северна Македонија, но и на многу други, рече министерката за одбрана Славјанка Петровска во вечерашното гостување на ТВ 21.
Според неа, очигледно е дека напаѓачот не сака да имаме стабилен и мирен Балкан.
„Секоја хибридна војна чијшто составен цел се овие сајбер напади има своја цел. Најчесто целта на хибридните војни или сајбер напади е практично да се дојде до пореметување на општественото живеење што впрочем и се случува кога има зачестени напади. Се повеќе и повеќе кога се создава задоволство во едно општество се надополнува со незадоволство на друга сфера. Целта е да се предизвика паѓање на Владите, најчесто оние кои се западно ориентирани“,
вели Петровска.
Таа претпоставува дека дел од сценариото зошто ова се случува во Северна Македонија е токму дел од оваа претпоставка.
„Пак ќе кажам, ова е само претпоставка која е дел од теориите за тоа што се хибридни закани и сајбер закани и е една од можностите зошто некој би започнал ваков тип на активности“,
посочи таа додавајќи дека се зборува за најсовремениот начин на војување, односно војување со неконвенционални средства.
Таа вели дека сајбер нападите се сериозен предизвик затоа што се неконвенционален тип на закани и појави.
„Институциите во Македонија веднаш реагираа, уште во првиот момент, особено МВР кое најповикано, односно е во прва линија најодговорно министерство или институција и ги стави на располагање своите расположливо капацитети. Кога зборуваме за сајбер нападите треба да видиме и која е нивната позадина. Прво е создавање на дел од стратегијата кога некој сака да направи сајбер напад. Тоа имаше за цел да предизвика прво страв и паника кај населението затоа што не е сеедно никому ако на имајл-адресата му стигне дојава за бомба. Друго е да се види колку институцијата има или нема капацитет да одговори на сите. МВР неселективно, следејќи ги правилата и процедурите во тоа министерство, изминатиот период реагираше на секоја една таква дојава“,
вели Петровска.
Петровска посочи дека е потребно институциите да вложуваат во човечкиот потенцијал, да вложуваат финансиски средства за унапредување на капацитетите на институциите во делот на сајбер одбраната.
„Секој предизвик со кој се соочуваме практично е тест за подготвеноста на институциите. Сериозно треба да се инвестира во унапредувањето на капацитетите во институциите, Министерството за одбрана го давам како позитивен пример, но и многу други институции каде навистина се прават исчекори во градењето на тие капацитети”,
подвлече Петровска.
Според министерката, Северна Македонија не е изложена на директна закана по безбедноста.
Според неа, тоа го покажуваат сите анализи и размени на разузнавачки информации кои ги имаме меѓу институциите, но и со партнерските служби.
На прашањето дали некој во НАТО се занимава со нападите во Македонија бидејќи земја членка е изложена на напади, Петровска рече дека Алијансата им помага.
„Кога зборуваме дали НАТО ни помага, добро е посочувањето, и ние сме НАТО. И ние сме земја членка која што има одговорност да учествува во создавањето на колективната безбедност севкупно. Се разбира дека имаме и право во ситуации кога ни е потребна било каков вид на поддршка тоа да го побараме од партнерите. Никогаш земјите членки не се оставаат меѓу себе. Комплексно е прашањето со сајбер нападите и хибридната војна во целина. Во суштина е сериозен предизвик, не само за нас, туку и за многу други држави кои се членки на НАТО“,
додаде таа.