Ана Петровска имаше намера да го дискредитира ДОМ како партија и не ѝ успеа, рече претседателката на ДОМ во „Утрински брифинг“, на што Петровска преку соопштение ѝ одговори дека ДОМ и ЛДП заедно освоиле 8 911 гласа, додека самата таа 9 954 гласа
Кандидатката за градоначалничка на Скопје од Зелен Хуман Град, Ана Петровска поппладнево реагира на изјавата на лидерката на ДОМ Маја Морачанин во која ја обвини Петровска дека сакала да ја дикредитира партијата.
„Маја Морачанин не може да се соочи со фактот дека е губитник на овие локални избори. ДОМ и ЛДП преку својот кандидат за градоначалник на Скопје освоиja 8 911 гласа, додека кандидатката на активистичката коалиција Зелен хуман град освои 9 954, или 1 043 гласа повеќе. Две партии со децениско присуство на политичката сцена што потрошија стотици илјади евра на билборди, промотивни видеа и печатен материјал, освоија помалку гласови од независен кандидат поддржан од граѓанска иницијатива, која немаше пристап до државни финансии и која се формираше неодамна и активно делува последните 2 месеци“,
се вели во писмената реакција од тимот на Петровска.
Морачанин денеска гостуваше во „Утрински брифинг“ на Слободна ТВ во која ја обвини Петровска дека потфрлила и како директорка во Државниот инспекторатот за животна средина, и дека не успеала да ја дискредитра партијата ДОМ чиј член беше.
„Во политиката мора да сте искрен и чесен кон граѓаните. Не може едно да ветувате, а во институциите друго да правите. Таа потфрли во инспекторатот како директорка и тоа беше причина за нејзино разрешување по што таа излезе од партијата. Сега инспекторатот покажува одлични резултати. Ана Петровска имаше намера да го дискредитира ДОМ како партија и не ѝ успеа“,
рече Морачанин за Слободна ТВ.
На ова Петровска, преку писменото соопштение вели:
„Маја Морачанин креира сопствена слика за реалноста и ги манипулира статистиките за изборите за да остане лидер на партија во изумирање. Собира гласови за советници и градоначалници, за да си ја зголеми ‘цената’ за пазарење со коалициските партнери. Кандидираше кадри од двете големи партии (Шуто Оризари, Радовиш, Кисела Вода), бидејќи нема сопствено членство. Нејзиниот генерален секретар, потпретседател и претседател на младинската организација (која не функционира веќе подолго време) доживеаја фијаско во Ѓорче Петров и Карпош. Од 21 советник од претходните избори ДОМ спадна само на 5“,
се наведува во соопштението.
Исто така, од од тимот наведуваат дека Морачанин со своето недемократско и нестатутарно „лидерство” ја претвори ДОМ во партија без идеологија и без поддржувачи, обвинувајќи ја за профитерство и политиканство, поради кои, како што велат, оваа партија под нејзино раководство нема иднина.