Коментирајќи ги наводите на ВМРО-ДПМНЕ за наводното следење кога биле во опозиција, Петровска ја критикуваше нивната блокадата за декласификацијата на документите
Сите директори на Агенцијата за државна безбедност (АНБ), вклучително и сегашниот, треба да подлежат на полиграфско тестирање пред комисијата за надзор, порача вечерва пратеничката на СДСМ и поранешна министерка за одбрана Славјанка Петровска.
Коментирајќи ги наводите на ВМРО-ДПМНЕ за наводното следење кога биле во опозиција, Петровска ја критикуваше нивната блокадата за декласификацијата на документите.
„Зошто не дозволивте да се декласифицираат документите кои се наводно дел од следењето, каде што може да се прочита целата содржина? Може ли вака да се договориме: ако не сакате да ги декласифицираме документите, бидејќи на комисијата ѝ беше попречен надзорот, дали се согласувате сите ние во Собранието секој што бил предмет на следење според закон, значи сите што излегоа во јавност, вклучувајќи ги сите директори на АНБ, вклучително и сегашниот директор, да подлежат на полиграфско тестирање пред комисијата за надзор?“,
истакна Петровска во дебата со нејзиниот колега Бране Петрушевски во „Само вистина“ на Канал 5 телевизија.
Премиерот Христијан Мицкоски и актуелниот директор на АНБ, Бојан Христовски, потврдија дека при внатрешна истрага во Агенцијата било утврдено незаконско, неетичко и непрофесионално постапување од еден поранешен директор и група вработени во периодот од 2019 до 2024 година.
По наводите за незаконско прислушување беше свикана седница на Комисијата за надзор над АНБ и АР, а пратениците изгласаа да извршат надзорот на АНБ и Агенцијата за разузнавање. Во надзорот учествуваа само членовите на Комисијата и нивните заменици кои имаат безбедносен сертификат.
Барањето за надзор на АНБ дојде на предлог на пратеникот и член на ова тело, Љупчо Пренџов.
Пред надзорот, пратеничката Петровска рече дека очекува Агенцијата за национална безбедност (АНБ) да има слух за барањето за декласификација на материјалите во врска со наводите за прислушување, додека нејзиниот колега од владејачката ВМРО-ДПМНЕ, Љупчо Пренџов вели дека она што е важно е да се види што се случувало во АНБ и кој сè бил таргет на следење во периодот кога партијата чиј член е беше во опозиција.
Пратеничката на СДСМ изјави дека од надзорот очекува на присутните членови на Комисијата да им биде дозволен увид во сите документи кои ќе ги побараат, како и оние за кои Агенцијата смета дека треба да им бидат достапни.
Петровска рече дека таа лично има подготвено триесетина прашања кои ќе ги упати за време на денешниот надзор, а кои, како што кажа, се во интерес на расчистување на овој случај.
Таа сподели дел од прашањата, но рече дека за жал тоа нема да може да го направи со одговорите што ќе ги добие бидејќи состанокот е класифициран.