Сценариото за одржување на првата меѓувладина конференција само откако ќе дојде до промена на Уставот во Северна Македонија, Петков во интервјуто го оценува како невиден успех за тимовите на бугарското МНР
Бугарскиот премиер, Кирил Петков, во интервју за БТВ, изјави дека при последната посета на министерката за надворешни работи Теодора Генчовска на Скопје е разговарано првата меѓувладина конференција на Република Северна Македонија со ЕУ да се одржи дури откако Бугарите ќе бидат вметнати во Уставот. Тоа, според Петков, засега е само на ниво на предлог.
„Министерката за надворешни работи Теодора Генчовска има разговарано дека само доколку се промени Уставот на Република Северна Македонија ќе се одржи првата меѓувладина конференција, а за тоа да гарантираат нашите европски партнери“,
рече Петков во емисијата „Лице в лице“ на БТВ.
Интервјуто на Петков следува само неколку часа откако коалицискиот партнер од „Има таков народ“ се повлече од владината коалиција, партија од чии редови доаѓа и Генчовска.
Сценариото за одржување на првата меѓувладина конференција само откако ќе дојде до промена на Уставот во Северна Македонија, Петков во интервјуто го оценува како невиден успех за тимовите на бугарското МНР.
Тој во интервјуто го објасни и своето барање да се свика Консултативниот совет за национална безбедност (КСНС). Сите нови можности за кои се дискутира, вели тој, сакам да бидат ставени на иста маса, додавајќи дека на тој состанок би сакал да се разговара и за новиот предлог.