Медведев на социјалните мрежи напиша дека евентуалната испорака на овие ракети во Киев би можела да заврши лошо за сите. Тој нагласи дека е невозможно да се направи разлика помеѓу „Томахавк“ способен да носи нуклеарна боева глава и оној со конвенционална боева глава за време на лет
Лансирањето на ракетите „Томахавк“ од Украина ќе бара вклучување на американски специјалисти, поради што евентуалната испорака на овие ракети во Киев и нивната употреба би можеле да имаат лош крај, изјави портпаролот на рускиот претседател Дмитриј Песков, на брифинг со новинарите.
„Навистина, работата со вакви сложени ракети ќе бара вклучување на американски специјалисти во процесот во секој случај. Ова е очигледен факт. Ова е споменато и во изјавата на Медведев“,
рече портпаролот на Кремљ, одговарајќи на барање за разјаснување на објавата на заменик-претседателот на рускиот Совет за безбедност, Дмитриј Медведев, дека испораката на такво оружје би можела да заврши лошо за сите.
Според Песков, секој што има дури и основно познавање на ова прашање е свесен за ова.
Медведев на социјалните мрежи напиша дека евентуалната испорака на овие ракети во Киев би можела да заврши лошо за сите. Тој нагласи дека е невозможно да се направи разлика помеѓу „Томахавк“ способен да носи нуклеарна боева глава и оној со конвенционална боева глава за време на лет.
Нема конкретни договори за телефонски разговор меѓу рускиот претседател Владимир Путин и американскиот лидер Доналд Трамп, но тој може брзо да се организира, додаде Песков.
„Навистина, судејќи според изјавите на Трамп, тој спомена таква можност (за водење телефонски разговор со Путин). Засега нема конкретни договори за телефонски разговор. Штом се појават, разговорот ќе се одржи. Постојат сите можности за многу брзо организирање на таков разговор“,
рече портпаролот на Кремљ.
Американскиот претседател Доналд Трамп навести дека би можел да дозволи на Киев да му се испорачаат ракети со долг дострел „Томахавк“, ако Русија не ја заврши војната против Украина. Рускиот претседател Владимир Путин, пак, претходно рече дека ракетите нема да претставуваат голема закана за неговата земја, но предупреди дека потегот би бил нова фаза на ескалација на односите меѓу Вашингтон и Москва.