Тој додаде дека во моментот она што го имаат детерминирано како аномалија, тоа е дека во моментот просекот на наплата од сопствени извори на финансирање од страна на локалните самоуправи е нешто повеќе од 50 проценти
Поради несоодветно собирање на средствата од сопствените извори на финансирање, општините на годишна основа губат од 100 до 120 милиони евра, изјави денеска министерот за локална самоуправа Златко Перински.
Перински вели дека централната власт работи на процесот на дигитализирање на услугите на локално ниво, со цел да се зголеми и ефикасноста при наплатата, а со тоа и самото децентрализирање.
„Едно е да зборуваме за децентрализација на надлежности, а друго е кога зборуваме за фискалната децентрализација, сега ќе го ставиме фокусот за фискалната децентрализација. Како тема никогаш нема да ја затвориме. Процесот на фискална децентрализација има почеток, но нема крај. И секогаш треба да се разговара аргументирано со двете страни на власта, и на локално ниво и на централно ниво“,
рече Перински на панел-дискусијата по повод една година Влада, насловена „Ги градиме темелите на промените. За твоето време кое доаѓа“.
Тој додаде дека во моментот она што го имаат детерминирано како аномалија, тоа е дека во моментот просекот на наплата од сопствени извори на финансирање од страна на локалните самоуправи е нешто повеќе од 50 проценти.
„Или да бидам попрецизен. На годишна основа, општините губат од 100 до 120 милиони евра, затоа што несоодветно си ги собираат сопствените извори на финансирање“,
додаде Перински.
Вториот аспект, како што посочи, е тоа што поради немање доволно финансиски потенцијал, општините не можат да ги извршат активностите во рамки на нивните надлежности, кои се резултат на поголемата децентрализација.
„Затоа ние секогаш како централна власт сме отворени да разговараме со општине, но од друга страна исто така и локалните самоуправи треба да го зголемат својот перфоманс во наплатата на сопствени извори на финансирање“,
кажа Перински.
Тој додаде дека изминатиот период заедно со министерот Стефан Андоновски од Министерството за дигитална трансформација земале обврска да ги дигитализираат услугите од општините кон граѓаните и да ги закачат на единствениот национален портал uslugi.gov.mk.
Перински додава дека во втора фаза се внатрешните процеси во рамки на дневните активности на вработените и на администрацијата на локалната самоуправа.
Тој вели дека паралелно со овие два процеса од централно ниво се ажурира базата на даночни обврзници на локално ниво, со цел општините да имаат ажурирана база на даночни обврзници и наплата на данок да се врши по електронски пат, а со сето тоа, како што рече „ќе се превенира субјективитетот на градоначалникот, кога и на кого ќе издадам даночно решение или кога и на кого нема да издадам даночно решение“.
Перински додаде дека во моментов има примери на навистина успешни градоначалници, коишто собираат сто отсто од сопствените извори на финансирање, но има и градоначалници кои што девет, десет години немаат издадено ниту едно даночно решение.