„Јас не очекувам дека ќе имаме поголеми проблеми во рамките на спроведувањето на локалните избори. Можеби ќе гледаме повеќе политички декор и фолклор отколку што сме навикнати, но не гледам дека во суштина локалните избори ќе бидат засегнати со ова неносење на предлог-измените на Изборниот законик“, изјави министерот за локална самоуправа одговарајќи на новинарско прашање на денешната прес-конференција
Перински денеска беше прашан и во врска со одлуката на Владата за намалување на бројот на советници во дел од општините, како резултат на бројките од пописот на населението од 2021 година, на што кажа дека секогаш кога доаѓаме пред избори на пиедестал се ставаат етнички прашања и се креираат тензии онаму каде што ги нема
Министерот за локална самоуправа Златко Перински не очекува поголеми проблеми при спроведување на локалните избори во октомври, а во контекст на одлуката на Државната изборна комисија (ДИК) независните кандидати да можат да се кандидираат со два граѓански потписи откако Собранието не успеа да ги изгласа измените на Изборниот законик поради немање Бадентерово мнозинство.
Имено, прашањето како гледа и што очекува од овие избори на Перински му беше поставено во контекст на изјавата на премиерот Христијан Мицкоски дека поради правилникот на ДИК за кандидирање на независните кандидати гласачкото ливче може да биде долго долго седум или осум метри и да ги обесхрабри граѓаните да излезат и да се намали цензусот.
Министерот за локална самоуправа, пак, смета дека на изборите можеби ќе има повеќе политички фолклор, но не очекува тие да бидат засегнати од недонесените измени на Изборниот законик.
„Јас не очекувам дека ќе имаме поголеми проблеми во рамките на спроведувањето на локалните избори. Можеби ќе гледаме повеќе политички декор и фолклор отколку што сме навикнати, но не гледам дека во суштина локалните избори ќе бидат засегнати со ова неносење на предлог-измените на Изборниот законик“,
рече Перински.
Неносењето на измените на Изборниот законик, според Перински, е поради политичкиот инает на актуелната опозиција.
За потсетување, Собранието на итната седница што се одржа на 16 август со 67 гласа „за“, 18 „против“ и ниту еден воздржан пратениците, при првото изјаснување, ги изгласаа измените на Изборниот законик, чија цел беше да се регулира бројот на потписи што треба да ги соберат независните кандидати за да може да учествуваат на избори. Но, на гласањето според Бадентер измените не поминаа – од пратениците од немнозинските заедници 11 гласаа „за“, а 18 беа „против“ (немаше воздржани), по што претседателот на законодавниот дом Африм Гаши констатира дека Собранието не го донесе законот за изменување и дополнување на Изборниот законик.
Измените, всушност, не поминаа зашто не ја добија поддршката од опозициската ДУИ и коалицијата што оваа партија ја предводи во парламентот.
Инаку, потребата од измени на Изборниот законик со кој требаше да се регулира бројот на потписи што треба да ги соберат независните кандидати, се наложи откако Уставниот суд во мај ги укина претходните одредби од Изборниот законик, односно членовите 61 и 62 со кои беа зголемени квотите за граѓански потписи кои требаше да ги соберат независните кандидати за градоначалници и листи за советници за учество на изборите.
На 17 август Државната изборна комисија (ДИК) донесе решение со кое утврди дека независните кандидатите можат да учествуваат на локалните избори за градоначалници и членови на советите со собрани два граѓански потписи.
Коментирајќи го ваквите околности, премиерот Христијан Мицкоски неодамна изјави поради можноста од енормен број на кандидати гласачкото ливче да биде долго седум или осум метри и да ги обесхрабри граѓаните да излезат и да се намали цензусот.
Во таа насока, премиерот рече дека согласно Уставот и Законот, доколку избирачкиот процес е неуспешен, токму Владата е таа која би требало да именува владини поверници, со што неодговорното однесување на поединци или политички партии може да резултира и со ваков тип можности.
Инаку, Перински денеска беше прашан и за одлуката на Владата за намалување на бројот на советници во дел од општините, како резултат на бројките од Пописот на населението од 2021 година, на што се спротивставуваат од Демократската унија за интеграција, од каде сметаат дека бројот на советници не може да се одредува врз основа на одлука на Влада и дека покрај резидентното население треба да се бројат и иселениците, односно нерезидентното население.
За потсетување, Уставниот суд кон крајот на јуни ја укина Методологијата за попис на населението од 2021 година, кои се однесуваат на категориите „резидентно“ и „нерезиденто“ население.
Како што рече Перински, одговорајќи на новинарско прашање, Уставниот суд укина дел од Методологијата по која што беше спроведен Пописот, но не ги укинал бројките што произлегоа од пописот.
За методологијата тој рече оти се виновни ДУИ и СДСМ.
„Следната работа која е битно да се спомене е дека нема ниту еден пример во светот каде како параметар се зема број на резидентни и нерезидентни жители, бидејќи нерезидентниоте граѓани не можат да бидат жители на една општина, тие се жители на друго место и затоа не можат да влезат во бројот на советници. Законот за локална самоуправа во членот 34, ако не се лажам, е многу прецизен и вели дека бројот на советници се одредува согласно бројот на жители во општината“,
рече министерот за локална самоуправа.
Согласно тоа, како што рече Перински, Владата лани во октомври донесе одлука со која направи промена на бројот на советници во 17 општини. Во 14 од нив го намали бројот на советници, а во три го зголеми.
„Јас точно знам дека секогаш кога доаѓаме пред избори, секогаш на пиедестал се ставаат етнички прашања, но треба да се запрашаат што претходно продале или понудиле на граѓаните како проект, мерка или нешто слично и да си ги надминат своите политички суети и да не креираат етнички проблеми и тензии онаму каде што нема бидејќи тоа е егзактна наука, согласно бројот на жители се пресметува бројот на советници“,
рече Перински.
На крајот тој изјави дека ваква одлука во 2023 година требало да донесе Владата предводена од тогашниот премиер и лидер на СДСМ, Димитар Ковачевски, но точката била тргната од дневене ред на седница на Влада.
„Уште една работа, која што досега никој не ја спомена, е дека иста ваква одлука како што донесе Владата минатата година, мислам во октомври, требало да донесе Владата на Димитар Ковачевски во 2023 година и треба да го прашате зошто е тргната таа точка од седница на Влада. Јас ја имам како документот, таа е изработена и била тргната од седница на Влада, идентична. Овие намалувања или зголемувања на бројот на советници не се креирани врз основа на македонски или албански етнички средини, во овие 17 измени, има општини каде што доминираат Албанци, но има и општини каде што доминираат Македонци. Еднаш засекогаш треба да престанеме државава да ја двоиме на етничка основа, мораме да креираме мерки и проекти кои ќе донесат благодат за сите граѓани жители коишто живеат во оваа држава“,
рече министерот за локална самоуправа Златко Перински на денешната прес-конференција.
Инаку, ова прашање за бројот на советници и (не)броењето на нерезидентното население беше причина ДУИ да не ги поддржи измените на Изборниот законик, како и да гласа против донесувањето на Упатството за пополнување образец за листи на кандидати за членови на советите на општините и на Советот на Град Скопје. Членката на ДИК, која дојде на предлог на ДУИ во Комисијата бараше Упатството да биде донесено со консензус, но по мислењето на правната служба на ДИК тоа беше донесено со мнозинство од пет гласа „за“ и еден „против“.
По ваквиот исход, членката на ДИК, Дитмире Шеху, поднесе тужба пред Управниот суд.