Пензиониран полициски службеник упатувал закани по живот кон министерот за внатрешни работи Оливер Спасовски поради што Обвинителството поведе постапка против него.
„Осомничениот, од својот мобилен телефон, се јавил во полициска станица во Центар со закана дека ќе биде убиен министерот за внатрешни работи, по што веднаш ја прекинал врската. Откако бил идентификуван и лоциран, бил извршен претрес во неговиот дом, при што биле пронајдени еден карабин марка Ц3 со калибар 8Х57, пиштол марка ‘чешка зброевка’ со калибар 7,65 мм, пиштол марка ‘смит енд весон’ модел 38/2, повеќе куршуми од различни калибри, еден пар лисици и телескопска палка“,
се вели во соопштението на ОЈО.
Како што додаваат од ОЈО, станува збор за лице кое, без разлика на тоа што е поранешен полициски службеник, било осудувано за други кривични дела, па поради страв дека постои сериозна закана да нападне некого, како и поради опасност од негово бегство бил доставен предлог за определување мерка притвор за осомничениот до судијата на претходна постапка од Основниот кривичен суд Скопје.