Протестот на кој присуствуваа мал број пензионери од главниот град се одржа во паркот „Жена борец“ пред Собранието на С Македонија. Главните барања на пензионерите беа зголемување на минималната пензија односно едначење со минималната плата, како и воведување линеарно покачување на пензиите наместо процентуално
Дел од скопските пензионери денеска се собраа на мирен протест пред Собранието во главниот град за да го искажат своето незадоволство од висините на минималната пензија и од процентуалното покачување кое е на сила. Тие истакнаа дека не се водат од партиски интереси, туку дека нивниот протест е егзистенцијален бидејќи пензионерите немаат доволен приход со кој би можеле да го поминат месецот.
„Не можеме да живееме со 12 000 пензија. Струјата е покачена, парното и водата и телефони се покачени. За храната да не зборуваме, лубеници не можеме да си дозволиме од што е зголемена цената на овошјето. На внуците не можеме да им купиме една чоколада, и затоа бараме да се покачи пензијата најмалку 20 до 25 илјади и тоа што поскоро“,
рече пензионерката Вера Стојановска.
Барањето за линеарно покачување велат дека е легитимно, иако дел од јавноста не се согласува бидејќи своевремено за секој човек биле исплаќани различни придонеси со кои се утврдува висината на пензијата – но, за пензионерите кои протестираат оваа констатација е невалидна бидејќи за сите пензионери цените на добрата и услугите се исти.
„Досегашниот износ не ги задоволува ниту минималните потреби и едно обично нормално живеење на луѓето. Ние Македонците сме мирен народ, и некој некогаш ќе каже остави го, Македонче, мирно е, ќе ќути, меѓутоа сега гласот на Македонецот се слуша и ќе се слуша уште повеќе“,
вели една од пензионерките.
Покрај денешниот протест во Скопје, минатите денови се организираа протести и во други градови во земјата, а помасовен собир се најавува за 14 август преку кој пензионерите велат дека ќе се обидат да ги достават своите барања до надлежните власти.
Инаку, за барањето за линеарно усогласување на пензиите денеска свој став соопшти и Сојузот на здруженија на пензионерите на Македонија (СЗПМ). Оттаму велат дека линеарно усогласување нема ниту во земјите од нашето опкружување ниту во пензиските системи на европските земји.
Во однос на протестите на пензионерите со ниски пензии, извршниот одбор на Сојузот на здруженија на пензионерите на Македонија на денешната седница заклучил дека во континуитет ги следат и ниските пензии и сите прашања во врска со правата на пензионерите. Но, велат дека овие прашања ги решаваат по институционален пат со давање иницијативи, предлози и мислења до надлежните органи во државата.
„Во услови на редовна исплата на пензиите и усогласување на пензиите со 8,4 проценти од први март 2023 година и очекувано услогласување од околу шест проценти од први септември, вкупното усогласување во 2023 година ќе изнесува околу 15 проценти, групи на незадоволни пензионери бараат поголемо усогласување на ниските пензии односно линеарно услогласување на сите пензии. Сојузот на здруженија на пензионерите на Македонија го поддржува барањето за покачување на висината на минималната пензијаи и затоа подготви предлози за зголемување на износот на најнискиот износ на пензија и истите ќе бидат доставени до Министерството за труд и социјална политика“,
се наведува во соопштението од СЗПМ.
СЗПМ смета дека предлозите се одржливи и остварливи и нема да предизвикаат финансиска нестабилност на Фондот на ПИОМ.