Претседателот Стево Пендаровски во интервју за неделникот Фокус се осврнува на состојбите во судството, каде според него, уште од осамостојувањето се етаблира политика на неказнивост
Тој смета дека правосудството не може да ја изгради својата независност бидејќи е под притисок од центрите на политичка, но уште повеќе од центрите на економска моќ
За него, од стратешко значење за државата е донесување на закон за потекло на имотот
Според проценките врз основа на сознанијата со кои располага, претседателот Стево Пендаровски мисли дека олигарсите во Македонија се повлијателни и полесно влијаат во судството отколку политичарите. Овој заклучок го изведува врз основа на информациите кои стигнуваат до него, ни правејќи споредба со минатите времиња.
„Јас до овој момент немам добиено информација дека некој политичар од актуелната власт по телефон издиктирал пресуда како што имавме случаи порано. Да не беа „бомбите на Заев“ и за тој период немаше да знаеме дека тоа масовно се случувало. Моја проценка е дека во време на оваа власт, во однос на високопрофилните случаи, далеку поголемо е влијанието на центрите на економска отколку на политичка моќ“,
вели шефот на државата Стево Пендаровски.
Во интервјуто за неделникот Фокус, Пендаровски нагласува дека проблемите во оваа сфера, лошата репутација на овој сегмент од власта и етаблирањето политика на неказнивост не е ништо ново и дека состојбата датира уште од осамостојувањето.
„Ние со правосудството имаме проблем од 1990-тите наваму затоа што никогаш не стана независно од центрите на политичка, но уште повеќе би рекол-на економската моќ. Ветингот што сакавме да го спроведеме во 2016 година веројатно ќе дадеше подобар резултат од сегашниот, но Европа ни рече дека поради лошото искуство со Албанија, не треба да размислуваме во таа насока. Без казнивост на луѓе кои очигледно не ги почитуваат законите, нема напредок“,
потенцира претседателот Пендаровски.
Според него, долгонајавуваниот законски проект за преиспитување на потеклото на имотот е од стратешко значење за земјата.
„Не гледам дека воопшто има разговор на таа тема меѓу двата политички блока. Сакам да видам заедничко постапување на власта и на опозицијата за ова законско решение. Да постигнеме консензус и да го испитаме имотот на сите кои се занимаваат со јавни работи“,
подвлекува претседателот во интервјуто за Фокус.