Според генералната содржина, не станува збор за ништо стратешко, туку за кредитирање на проектите кои допрва ќе бидат прецизирани од двете страни, вели експретседателот
Не е потпишан договор за стратешко партнерство меѓу Македонија и Велика Британија. Тоа што ни е дадено на увид и што е ратификувано во средата попладне во Собранието не е договор за стратешко партнерство, вели во интервју за „Дојче веле“ поранешниот претседател на државата, Стево Пендаровски.
„Владата најави стратешки договор со Обединетото Кралство, но досега видовме само меморандум за соработка“,
вели експретседателот во интервјуто.
Пендаровски вели дека според својата содржина договорот помеѓу Македонија и Обединетото Кралство може да биде меморандум за соработка, дури и почетно писмо за намери во четирите области кои владите на двете држави ги набројуваат, а за кои допрва треба да се прецизира какви проекти би опфатиле.
„Според генералната содржина, не станува збор за ништо стратешко, туку за кредитирање на проектите кои допрва ќе бидат прецизирани од двете страни – британско кредитирање за инфраструктурни проекти во Македонија. Тие најавуваат дека е можно да постои втор договор после овој кој би бил за стратешките аспекти на нашите билатерални односи со Лондон. Да сме живи и здрави, можеби и тоа еден ден ќе биде. Но ова нема никаква врска со стратегија, тоа е начелен договор, допрва да седнеме и да видиме што вам ви треба за кредитирање“,
вели Пендаровски во интервјуто за „Дојче веле“.
На 23 мај во Лондон беше потпишан договорот влада со влада меѓу С Македонија и Обединетото Кралство. Со потпишаното партнерство со Обединетото Кралство на земјава ѝ се ставаат на располагање шест милијарди евра за инфраструктурни и капитални проекти во различни сектори како транспорт, здравство, енергетика и технологија.
Пет дена по потпишувањето, на 28 мај, во македонското Собрание со мнозинство од 76 гласа „за“ беше донесен Законот за ратификација на договорот „влада со влада“ меѓу Северна Македонија и Обединетото Кралство во врска со партнерството за реализација на инфраструктурни проекти.