Јасно е дека нема две третини од пратениците кои во овој момент ќе гласаат за уставни измени, а опозициската ВМРО-ДПМНЕ без аргументи го кочи процесот, грижејќи се единствено за партискиот интерес, вели претседателот на државата Стево Пендаровски во интервју за „Слободен печат“. Според него, и на политичките лаици им е јасно дека и да дојде ВМРО-ДПМНЕ на власт, нема да може да ја смени Преговарачката рамка бидејќи повторно ќе треба согласност од Бугарија.
„Јас не велам дека не се разговара со пратеници, но од она што го гледам од средствата за јавно информирање, не можам да видам дека таму се менува расположението макар и кај еден пратеник, за да можам да тврдам дека ќе има уставни измени. Велам треба да има, императив е да има, затоа што ако нема, ние практично остануваме во една посебна подгрупа со Босна и со Косово. И ако до 1 декември не го смениме Уставот, можно е Албанија и Црна Гора да тргнат забрзано кон Европа, а ние сами себе да се блокираме“,
посочува Пендаровски.
За Пендаровски не се јасни аргументите на опозицијата зошто е против уставните измени, а таков впечаток вели дека имаат и странците кои изминативе денови беа во посета на земјава на средби со претставници и од власта и од опозицијата.
„Во тој дел немаат слушнато валиден аргумент досега зошто се против. Ги кажуваат ставовите што македонската јавност ги знае, прво велат дека овој парламентарен состав нема мандат бидејќи во 2020 година на граѓаните не им кажал дека ќе има промена на Уставот и внесување на Бугарите. Вториот аргумент е дека не сакаме под бугарски диктат да влеземе во Европа. Свесно занемарувајќи, бајпасирајќи го фактот дека не станува збор за бугарски диктат, туку се работи за Преговарачка рамка за која се согласија 26 земји членки. Би било чесно да кажат, под европски диктат не сакаме да влеземе во Европа. Тоа се „аргументите“ што странците не можат да ги разберат, исто како и јас и дел од граѓаните“
вели Пендаровски.
Според него, доколку не се случат уставните измени, државата нема да пропадне, но не може да напредува како што би напредувала кога би била во европските интеграции, би ги користела сите фондови и совети за да можеме да просперираме и во економијата, социјалата, политиката, културата, владеењето на правото. Пендаровски во интервјуто зборува и за можната посета на земјава од страна на францускиот претседател Макрон.
„Макрон сигурно не би дошол овде да ги убедува политичките партии што се против уставните промени, туку ако постојат извесни шанси за успех. Има шанса, во зависност од внатрешниот процес како ќе оди, Макрон да дојде во Скопје на 11-12 септември на процесот Брдо Бриони. Ако е податлива атмосферата, има шанси да дојде на процесот Брдо, да даде поддршка на целиот регион. Затоа чекаме да видиме како ќе се одвива процесот внатре за Уставот“,
додава претседателот.
Од ВМРО-ДПМНЕ испратија реакција во која велат дека не очекуваат претседателот Пендаровски да ги разбере нивните аргументи за уставите измени, но народот, како што велат, ги разбира бидејќи се во корист на државните интереси.
„Добро е што над 80% од граѓаните ги разбираат аргументите и истите ги поддржуваат. Очигледно Пендаровски се разминува со својот народ исто како што се разминува со реалноста и националните интереси. Пендаровски како претседател на државата треба да размисли зошто не ги разбира државните интереси и интересите на македонскиот народ“,
велат од ВМРО-ДПМНЕ.