За време на средбата со шпанскиот премиер Санчез, Пендаровски изразил задоволство од динамиката на политичките контакти во последните неколку години, истакнувајќи дека истите значително придонесуваат за унапредување на односите меѓу двете држави
Дополнително, на средбата било посочено дека претстојното претседателство на Северна Македонија со ОБСЕ во 2023 година и претседателството на Шпанија со Европската Унија во втората половина на 2023 година се добра можност за меѓусебно координирање во однос на активностите и приоритетите
По средбата со премиерот Димитар Ковачевски, премиерот на Кралството Шпанија, Педро Санчез Перез-Кастехон попладнево оствари средба и со шефот на државата, Стево Пендаровски.
„Поздравувајќи ја првата посета воопшто на еден шпански премиер на нашата држава, претседателот Пендаровски истакна дека Шпанија низ годините се покажа како важен партнер на Северна Македонија на билатерален и мултилатерален план и принципиелен поддржувач на аспирациите за членство во Европската Унија“,
соопштија од прес-службата на претседателот Пендаровски.
Оттаму додаваат дека на средбата со Санчез, Пендаровски изразил задоволство од динамиката на политичките контакти во последните неколку години, истакнувајќи дека истите значително придонесуваат за унапредување на односите меѓу двете држави.
„Во таа прилика, претседателот Пендаровски го истакна интересот за натамошно проширување на економската соработка, трговската размена и инвестициската соработка во наредниот период“,
додаваат од Кабинетот на претседателот.
Во однос на одлуката на Европската Унија за почеток на пристапните преговори со Северна Македонија и Албанија, претседателот Пендаровски оценил дека отворањето на преговорите е од големо значење не само за реформските потфати во двете држави туку има влијание и во актуелните геополитички и безбедносни околности во регионот и на европскиот континент. Во тој контекст, Пендаровски нагласил дека Северна Македонија останува конструктивен партнер на Европската Унија во одговорот на предизвиците предизвикани од воената агресија врз Украина.
„На средбата беше посочено дека претстојното претседателство на Северна Македонија со ОБСЕ во 2023 година и претседателството на Шпанија со Европската Унија во втората половина на 2023 година се добра можност за меѓусебно координирање во однос на активностите и приоритетите“,
додаваат од прес-службата на претседателот.
Во текот на разговорот, како што додаваат од прес-центарот на претседателот, Пендаровски и Санчез размениле мислења и во однос на актуелните случувања во регионот на Западен Балкан.
Претходно денеска, премиерот на Кралството Шпанија оствари средба со премиерот на Северна Македонија, Димитар Ковачевски.