Францускиот предлог е интерна работа на ЕУ во рамки на подготовката на заклучоците на Европскиот совет што Франција како претседавач со ЕУ треба да ги достави до сите земји членки. Немам намера да коментирам дали владата или собранието во Софија ќе успее, тоа е внатрешна бугарска политика, изјави Пендаровски
Првиот елемент е дека не сакам да коментирам што ќе се направи во рамки на француското претседателство. Сакаме да посредуваме да се најде решение меѓу 27-те лидери, го подготвувавме овој состанок и неколку дена пред тоа мора да имаме некаква дискреција, рече Мишел
Ние во Скопје немаме видено француски предлог. Имаме разговори со нашите бугарски колеги. Немам намера да коментирам дали владата или собранието во Софија ќе успее, тоа е внатрешна бугарска политика, изјави претседателот Стево Пендаровски на прашањето што содржи францускиот предлог за кревање на ветото од Бугарија.
Тој нагласи дека францускиот предлог е интерна работа на ЕУ во рамки на подготовката на заклучоците на Европскиот совет што Франција како претседавач со ЕУ треба да ги достави до сите земји членки.
„Заклучоците се далеку од готови. Ние не можеме да влијаеме. Тоа е работа на земјите членки. Сигурно е дека ќе има параграф за Северна Македонија, како и за други земји. За тоа се прашуваат сите земји членки, вклучувајќи ја и Бугарија,“
рече Пендаровски на прес-конференцијата во Охрид со претседателот на ЕС, Шарл Мишел.
Тој потсети дека веќе неколку месеци траат разговори меѓу министерствата за надворешни работи на Северна Македонија и на Бугарија, кои, како што посочи, се водат и во моментов.
„Разговори постојат со месеци наназад меѓу МНР и меѓу Скопје и Софија. Такви разговори има и сега“,
рече Пендаровски.
Мишел пак, не сакаше да коментира што ќе има во заклучоците и говореше само за тоа што ќе биде на дневен ред.
„Сакам да потврдам дека работиме напорно за да постигнеме конкретни резултати за време на Советот. Би сакал да споделам со вас што ќе биде на состанокот. Има три важни и тешки теми: едната е ЕУ апликацијата на Украина, Молдавија и Грузија, втората е во однос на релациите ЕУ и Западен Балкан, процесот со Западен Балкан и не залудно патувам во овие земји и донесов одлука за состанок пред Самитот и да разговараме сериозно како да се постигнат конкретни резултати за забрзување на процесот“,
истакна тој.
Конкретно, за содржината на францускиот предлог, побара дискреција и разбирање во пресрет на Самитот.
„Првиот елемент е дека не сакам да коментирам што ќе се направи во рамки на француското претседателство. Сакаме да посредуваме да се најде решение меѓу 27 лидери, го подготвувавме овој состанок и неколку дена пред тоа мора да имаме некаква дискреција“,
рече Мишел.
Во однос на предлогот за Европска политика заедница, Мишел беше дециден дека не се работи за алтернатива на проширувањето и членството во ЕУ.
„Поради војната во Украина, потребна ни е платформа која ќе им овозможи на 27-те лидери и на други партнери на ЕУ да соработуваат за одредени геополитички теми – на пример енергетскиот сектор и би било добро на највисоко ниво да се слушнеме и да си помогнеме. Тоа е суштинско прашање. Други примери се економската стабилност, безбедноста. Потребна ни е одлука за проширување на ЕУ и да се постигне забрзување на политичката интеграција. Сакаме да се избегне недоразбирање. Оваа платформа ќе биде екстремно корисна да се забрза процесот за интеграција во ЕУ. Ќе има и земји кои нема да сакаат членство и оние кои сакаат на редовна основа и ова ќе биде можност за размена на информации“,
рече Мишел на прес-конференцијата во Охрид.
Во врска со францускиот предлог за европска политичка заедница, Пендаровски истакна дека ова не е алтернатива за проширување.
„Станува збор за еден политички форум за комуникација и консултација – оние кои преговараат или не преговараат за членство и оние кои немаат намера да бидат дел или излегле од ЕУ како Велика Британија. Ние само побаравме објаснување за да можеме да им објасниме на луѓето кои се убедени дека таа е компензација за членство. Досегашните канали за преговори и членство остануваат. Не ни се одзема ништо ако бидеме присутни и на овие политички консултации“,
истакна Пендаровски.