За време на средбата на претседателот Стево Пендаровски и шведската амбасадорка во земјава, Кристин Форсгрен-Бенгтсон, претседателот ја поздравил одлуката на Шведска за барањето кое го достави за прием во НАТО, карактеризирајќи ја како одлука на суверена држава која има право на тоа и додавајќи оти нашите државни позиции се во поддршка на политиката на отворени врати на Алијансата
Претседателот Стево Пендаровски денеска ја прими шведската амбасадорка Кристин Форсгрен-Бенгтсон која го информира за одлуката на Кралството Шведска да поднесе барање за членство за прием во НАТО, информираа од Кабинетот на претседателот.
„Во таа пригода претседателот Пендаровски ја поздрави оваа одлука на Шведска карактеризирајќи ја како одлука на суверена држава која има право на тоа и додаде дека нашите државни позиции се во поддршка на политиката на отворени врати на НАТО“,
стои во соопштението од Кабинетот на претседателот.
Од Кабинетот додаваат оти двајцата соговорници размениле информации во однос на динамиката на процесот на пристапување во Алијансата, при што претседателот Пендаровски истакнал дека со полноправното членство на Шведска во НАТО, одличните билатерални односи ќе добијат на уште посилен интензитет преку идното сојузништво во Алијансата.
Претходно денеска шведската министерка за надворешни работи Ан Линде потпиша апликација за влез на земјата во НАТО, а ова на Твитер го објави претставништвото на земјата во Алијансата.