Ако договорот меѓу власта и опозицијата не се почитува, рече шефот на државата, очекувајте наредните денови јавно да посочам кон оние што не се однесуваат одговорно
На сите ни е преку глава од политички договори што денес се постигнуваат, а утре страните излегуваат со различни толкувања, рече претседателот по седницата на Советот за безбедност
Претседателот Стево Пендаровски, по денешната седница на Советот за безбедност, го поздрави договорот што вчера го постигнаа лидерите на СДСМ и на ВМРО-ДПМНЕ, Зоран Заев и Христијан Мицкоски. Сепак, тој нагласи дека очекува да види и имплементација на договорот.
Рече дека е во ред што е одложен пописот во ситуација кога се засилува епидемијата на ковид-19 и дека потоа неоспорувањето ќе го потврди кредибилитетот на операцијата.
Позитивен исход очекува и од утрешната средба со, како што рече, партиите што предлагаат измени на Законот за државјанство.
„Не е добро поради еден предлог на опозициска партија парламентот да биде парализиран, како што од друга страна не е добро ниту да не им се решава статусот на граѓани што со години живеат во земјава, а не може да стекнат државјанство“,
рече Пендаровски за измените на Законот за државјанство, што ги предлагаат Алијансата за Албанците и Алтернатива.
Зборувајќи за блокадата на парламентот, тој нагласи дека мора да престане префрлањето на одговорноста.
„Поради пратеници заболени од ковид-19, парламентот е нефункционален подолго време. Таа игра на префрлање на одговорноста треба да престане. Се радувам што клучните лидери се договорија за релативно кратко време, ама сакам да видам имплементација. Тој договор треба да се спроведе. По една година карантин и изолација, не смееме да ги изневериме граѓаните. На сите ни е преку глава од политички договори што денес се постигнуваат, а утре страните излегуваат со различни толкувања“,
рече Пендаровски.
Ако договорот меѓу власта и опозицијата не се почитува, рече шефот на државата, очекувајте наредните денови јавно да посочам кон оние што не се однесуваат одговорно.
Пораки за политичките случувања претседателот ги кажа надвор од денешната дискусија на седницата на Советот за безбедност. На неа се разговараше за состојбата со ковид-19 и претседателот упати порака дека е срам за државата што се дозволи граѓани да одат во Србија да се вакцинираат зашто должност на државата е да им обезбеди здравствена заштита тука.
За да нема сомнеж за злоупотреби, на Советот за безбедност, рече Пендаровски, е договорено функционерите да се пријават за вакцинација преку интернет-страницата на Министерството за здравство и да се вакцинираат тогаш кога ќе им дојде редот, како и на сите други граѓани.
Шефот на државата упати и личен апел до приватните болници да ги намалат цените за лекување на ковид-пациентите и им порача дека никој не треба да ги искористува личните трагедии за профит.