Потпишувањето следува откако пратениците од власта и опозицијата викендов ги изгласаа измените во Законот за финансирање на политичките партии
Претседателот Стево Пендаровски денеска го потпиша указот за прогласување на Законот за изменување на Законот за финансирање на политичките партии, информираа од неговиот кабинет.
Претседателот испраќа и порака дека на ист начин треба да им се вратат парите и на институциите од витален јавен интерес.
„Претседателот Пендаровски очекува дека на ист начин на којшто на политичките партии им се враќаат запрените средства за финансирање, коишто законски им следуваат, ќе им се вратат и финансиските средства на сите институции коишто остваруваат витален јавен интерес. Средствата беа запрени во услови на вонредна состојба заради нивно користење за справување со економските и социјалните последици од здравствената криза“,
соопштија од кабинетот на Пендаровски.
Потпишувањето следува откако пратениците од власта и опозицијата викендов ги изгласаа измените во Законот за финансирање на политичките партии.
Со изгласувањето се овозможи на партиите да им се вратат парите што беа запрени во текот на вонредната состојба. Разликата е што за оваа и за наредната година тие ги намалија за 30 отсто средствата од Буџетот предвидени за нивно финансирање.
Според измените, вкупните средства за годишно финансирање на политичките партии за 2020 година и за 2021 година се во висина од 0,105% од вкупните приходи на буџетот.