Тешко дека тие слики на наши граѓани кои бараат здравствена заштита во странство, откако не ја добија во сопствената земја, се за фалење – реагира шефот на државата
Продолжува преписката меѓу шефот на државата, Стево Пендаровски и министерот за здравство, Венко Филипче, околу тоа кој е виновен што македoнските граѓани наместо дoма се вакцинираа во Србија.
Првично, Пендаровски рече дека е благодарен на потегот што Србија овозможи имунизација на македонски граѓани, но рече дека е срамно за државата што тука не беа навреме овозможени вакцините против ковид-19. На тоа возврати министерот Филипче, кој рече пак дека Пендаровски по функција како претседател на државата требало да се вклучи и да помогне во набавката на вакцините.
Сега, шефот на државата повторно реагира и вели дека тој уште во декември лани прв ги воспоставил контактите во фармацевтските компании и активно е вклучен во процесот за набавка на вакцините.
„Во однос на процесот на набавка на вакцини, претседателот Пендаровски е крајно зачуден што министерот Филипче свесно не го споменува фактот дека првичните контакти со најголемите фармацевтски компании, кон крајот на декември минатата година се направени преку Кабинетот на претседателот и од тогаш до денес претседателот Пендаровски е активно вклучен преку дипломатските канали во процесот за набавка на вакцините, што инаку е примарна надлежност токму на министерот за здравство“,
велат од кабинетот на Пендаровски.
Се додава дека шефот на државата се согласува со изјавата на министерот за здравство, Венко Филипче дека сликите од Србија изминатиот викенд се израз на солидарност, но, велат дека тоа е солидарност која државата Србија ја покажа кон десетина илјади наши граѓани.
„Тешко дека тие слики на наши граѓани кои бараат здравствена заштита во странство, откако не ја добија во сопствената земја, се за фалење“,
се додава во писмената реакција на Пендаровски.