На Бугарија да ѝ се укинат визите за САД и земјата да влезе во Шенген зоната, за да го тргне ветото за почеток на преговорите на Северна Македонија со Европската Унија, предлага лидерот на движењето Има таков народ, Слави Трифонов, преку Фејсбук статус.
„Бидејќи Американците толку многу сакаат Северна Македонија да е во Европската Унија, на граѓаните на Бугарија, како и на граѓаните на повеќето земји во Европската Унија, да не им требаат визи за да одат во Америка… И второ, повторно, бидејќи сме полноправна членка на Европската Унија, Бугарија мора веднаш да стане членка на Шенген зоната. По чекање и чекање и ние треба да бидеме Европејци. Сега сме помалку Европејци од вистински Европејци. Значи барам веднаш да нема визи за Америка и за членките на Шенген зоната“,
побара Трифонов.
Според Трифонов, исполнувањето на овие два услови од страна на САД и ЕУ, како и исполнувањето на Договорот за добрососедство од македонска страна, ќе бидат доволни за Бугарија да дозволи Северна Македонија да ги почне преговорите.
Тој најави дека на 10 јануари ќе се одржи советодавен состанок на тема Северна Македонија кај претседателот на државата Румен Радев. Трифонов не кажува дали официјално ќе го поднесе овој предлог на разгледување, но вели дека „сите ги притискаат да попуштат“ во спорот.
Трифонов во објавата на ФБ пишува дека „стотици илјади Македонци имаат бугарски пасоши“ и се чуди на омразата кон Бугарите во Македонија. „Во вашите учебници по историја пишува дека Бугарите се фашисти. Значи, вие самите сте фашисти“, пишува тој.
Партијата на Трифонов е дел од новата владејачка коалиција во Бугарија, како и министерката за надворешни работи Теодора Генчовска.