Мицкоски апелираше до трговците да го преиспитаат своето однесување и да не се служат со трикови
Пазарните инспектори да тргнат во вонредни контроли кај трговците за да утврдат како цената на одредени основни производи е зголемена во изминатите 30 дена. Ова премиерот Христијан Мицкоски најави дека ќе го побара на денешната владина седница од министерот за економија и труд.
Мицкоски апелираше до трговците да го преиспитаат своето однесување и да не се служат со трикови.
„Со трикови не функционирам и тие што мислат дека ќе функционираат со трикови, се лажат. Не може тоа што на нив им беше дадено како право и можност за едни производи, сега да го прават со драматично зголемување на некои други призводи како маслото, лебот, млеко, млечни производи, јајца, брашно. Жестоко ќе се спротивставиме на оние што мислат дека нè надмудриле. Срамота е ова што го прават пред празниците што доаѓаат“,
рече Мицкоски денеска по пуштањето во употреба на спортска сала во населено место Црешово во Општина Гази Баба.
Тој додаде дека тоа што го прават трговците не е коректно и затоа вели дека ќе побара вонредна инспекција за ова, како што рече, девијантно однесување да престане.
Во однос на 250 милиони евра од првата транша од унгарскиот кредит кои се наменети за бизнис-секторот, Мицкоски рече дека има административни процедури што треба да се завршат и очекува во јануари овие средства да бидат оперативни. Тој додаде дека во парламентот треба да помине закон за кој рече дека сакаат да помине во редовна процедура, а не тој да биде ставен на брза лента.
Мицкоски најави и дека се подготвува измена на законското решение со кое нема да има покачување на функционерските плати. Ова законско решение Мицкоски рече дека наскоро ќе се најде пред пратениците и со него ќе има раст на платите на сите вработени во државата, освен за функционерите.