Пет угостителски објекти се затворени во период од 28 декември до 3 јануари. Два од нив биле затворени за време на новогодишната ноќ во Струмица и Битола. Како што информираше претседателката на Инспекцискиот совет, Магдалена Филипоска Грашковска, споредено со периодот од 21 до 27 декември, кога беа затворени 13 угостителски објекти, зсега бројката е намалена за повеќе од 60 проценти.
Државниот пазарен инспекторат (ДПИ) ги спровел контролите во соработка со Министерството за внатрешни работи (МВР) и извршил 4652 контроли и 278 надзори поврзани со почитување на протоколите за работа на угостителските објекти.
„Изречени биле 35 прекршочни пријави, 24 решенија за констатирани неправилнсти и 16 прекршочни платни налози. Од 24-те решенија, пет се донесени за непочитување на Законот за заштита на населението од заразни болести и протоколот за работа на угостителските објекти – по два во Битола и Тетово и за еден во Струмица, каде што не се почитувало работното време и ограничувањето за четири лица на една маса. Во сите случаи е изречена забрана за вршење дејност, тие се затворени за работа на самото место и дополнително се изречени соодветни прекршочни платни налози“,
информира Грашковска.
Директорот на ДПИ, Стојко Пауновски рече дека од петте угосителски објекта, два се затворени во Битола. Едниот на 3 јануари, поради пречекорување на работното време по 18 часот, и ќе биде затворен десет дена.
Другиот објект е казнет 30 работни дена зашто во него на новогодишната ноќ имало забава со многу повеќе луѓе отколку што би собирал во нормални услови. Согласно Закон за прекршоци, ќе биде изречена и глоба.
Останатите два објекти се затворени во Тетово и во нив не се почитувало работното време и ограничувањето за 4 лица на една маса. Во сите случаи изречена е мерка забрана за вршење на дејност, односно истите се затворени за работа на лице место, а дополнително и изречени им се соодветни прекршочни платни налози.
Пауновски очекува оваа година Инспекторатот да се засили и со нови вработувања зашто според договорот со Владата и во рамки на дозволениот буџет за плати, ќе вработат инспектори на местото на тие што се пензионираат.
„Нашето барање беше околу 20 луѓе да примиме во 2020 и 2021. За оваа година имаме најавени 32-33 пензионирања, што значи бројката од 20 нови примања ќе ја спроведеме. Дел од кусокот на вработени инспектори во ДПИ во овој период го пополнивме со преземање други административни службеници“,
рече Пауновски.