„Од 100 присутни членови, само неколкумина предложија да настапиме самостојно, а ниту еден не беше за останување со СДСМ. Дури 90 отсто се изјаснија за коалиција со актуелната власт. Желбата на членството е јасна, да одиме со власта“, вели претседателот на партијата, Илија Николовски
Партијата на пензионерите ја напушта досегашната коалиција со Социјалдемократскиот сојуз (СДСМ). На претстојните локални избори се очекува да настапи како дел од коалицијата, предводена од ВМРО-ДПМНЕ.
Според претседателот на партијата, Илија Николовски одлуката е донесена на барање на членството, бидејќи 90 отсто од нив се изјасниле дека сакаат да соработуваат со актуелната власт.
Во вторник ќе биде донесена и официјална одлука оваа партија да влезе во преговори со владејачката ВМРО-ДПМНЕ за претстојните локални избори.
Оваа одлука, Николовски вели дека му ја соопштил и на лидерот на опозицијата, Венко Филипче.
„Ние како Партија на пензионери досеега бевме дека од коалицијата со СДСМ. Водевме дискусија во извршниот и централниот одбор. Од 100 присутни членови, само неколкумина предложија да настапиме самостојно, а ниту еден не беше за останување со СДСМ. Дури 90 отсто се изјаснија за коалиција со актуелната власт. Желбата на членството е јасна, да одиме со власта“,
вели Николовски.
Во разговорите со ВМРО-ДПМНЕ пензионерите бараат советници во повеќе општини, кандидат за градоначалник во Карбинци, но и членство во уравни одбори на локално и на централно ниво.
За Николовски е важно Партијата на пензионерите да добие места во управните одбори во Пензиско и инвалидско осигурување на Македонија (ПИОМ) и Фондот за здравствено осигурување (ФЗО).
На 23 јуни политичката партија Демократска обнова на Македонија (ДОМ) соопшти дека ја напушта коалицијата со СДСМ.
Изразувајќи целосна почит кон соработката во минатото, од партијата велат дека напуштањето на коалицијата со СДСМ претставува принципиелен исчекор кон заштита на вредносниот интегритет на ДОМ.