Локалните избори 2025 се осми од независноста на државата, а четврти на кои се избираат градоначалници и советнички листи во 80 општини и Градот Скопје. Ќе се гласа на 3 480 избирачки места за 309 кандидати за градоначалници и 576 кандидатски листи за членови на општинските совети или за вкупно 10 490 кандидати
Денеска (29 септември) и официјално почнува изборната кампања за локалните избори закажани за 19 октомври, во рамките на која партиите и независните кандидати ќе имаат можност да ги претстават своите програми пред гласачите.
Изборната кампања ќе трае до 17 октомври на полноќ, по што ќе следи 24-часовен предизборен молк пред гласањето на 19 октомври. Вториот круг од гласањето за градоначалници е предвидено да се одржи две недели подоцна, односно на 2 ноември, во оние општини каде кандидатите нема да освојат доволно гласови во првиот круг.
Кампањата е веќе започната и на социјалните мрежи, а дел од партиите и независните кандидатите денеска ќе одржат јавни настапи на кои кандидатите ќе почнат со претставување на своите изборни програми.
Владејачката ВМРО-ДПМНЕ и коалицијата „Твоја Македонија“ изборната кампања за локалните избори ќе ја почнат во Скопје со настан на кој ќе го промовираат својот кандидат за градоначалник на Град Скопје, Орце Ѓорѓиевски, кој изминатите четири години ја предводеше администрацијата на скопската општина Кисела Вода.
Инаку, претставувањето на сите кандидати за градоначалници и носители на листи за советници ВМРО-ДПМНЕ и коалицијата го одржа во саботата во Штип.
Социјалдемократскиот сојуз на Македонија својот централен настан на првиот ден од формалниот старт на изборната кампања ќе го одржи во Крушево. Таму социјалдемократите ќе го претстават својот кандидат за градоначалник на овој град, Томе Христовски, а претходно со нивниот изборен караван ќе престојуваат во Демир Хисар и Могила.
Вчера, Социјалдемократскиот сојуз на Македонија ги претстави сите кандидати за градоначалници и носители на листи за советите во општините и Градот Скопје.
Кандидатот за градоначалник на Град Скопје, професорот Горан Марковски, поддржан од граѓанско-политичката платформа „Независни заедно“ кампањата ќе ја почне со прес-конференција на улицата „Љубљанска“ во Карпош.
Централниот настан за претставување на кандидатите за градоначалници, коалицијата ВРЕДИ, која е дел од централата власт, ќе го одржи утре во Скопје, а денеска на плоштадот „Скендербег“ свое претставување ќе има кандидатот за градоначалник на Чаир, Изет Меџити, и советничката листа за оваа скопска општина.
Демократската унија за интеграција (ДУИ) централниот настан за претставување на кандидатите за градоначалници го одржа синоќа во Скопје.
Вчера претставување на своите кандидати за градоначалници и советници организира и коалицијата „Искуство за успех“, што ја сочинуваат Либерално-демократската партија (ЛДП), ГРОМ, Интегра и ПЦЕР.
Претставувања на кандидатите за градоначалници и совети ќе има и во други општини.
Како што е предвидено во Изборниот законик (со членот 69-а), за изборна кампања се смета јавно собирање и други јавни настани организирани од страна на учесникот во изборната кампања, јавно истакнување на плакати, видеопрезентации на јавни места, изборно медиумско и интернет-претставување, дистрибуирање на печатени материјали и јавно претставување на потврдените кандидати од надлежните изборни органи и нивните програми.
Локалните избори 2025 се осми од независноста на државата, а четврти на кои се избираат градоначалници и советнички листи во 80 општини и Градот Скопје. Ќе се гласа на 3 480 избирачки места за 309 кандидати за градоначалници и 576 кандидатски листи за членови на општинските совети или за вкупно 10 490 кандидати.
На изборите учествуваат 22 партии, 19 коалиции и 119 групи на избирачи односно независни кандидатури.
Најмногу кандидати за градоначалници има за Градот Скопје, вкупно 16.
Според Изборниот законик, локалните избори се одржуваат на секои четири години во втората половина на октомври. Локалната самоуправа е организирана во 80 општини и Градот Скопје како посебна единица на локалната самоуправа. Во состав на Градот Скопје функционираат 10 општини, кои имаат поделени надлежности со Градот. Изборите ги распишува претседателот на Собранието со донесување акт што се објавува во „Службен весник“. Изборите се одржуваат најрано 70, а најдоцна 90 дена од денот на распишување на изборите.
Локални избори во Македонија се одржале во 1996, 2000, 2005, 2009, 2013, 2017 и во 2021 година.