Пред пет години крајнодесничарската Партија на слободата (ФПО) испадна од коалициската влада со конзервативната Народна партија поради корупциски скандал. Но сега, предводена од Херберт Кикл, партијата е на дофат на историска победа
Според предизборните анкети, крајнодесничарската партија е во тесно водство пред владејачка конзервативна Народна партија на канцеларот Карл Нехамер, а опозициските социјалдемократи се на трето место
Австријците денеска гласаат на парламентарни избори на кои, според анкетите, првпат би можела да победи крајнодесничарската опозициска Партија на слободата (ФПО). Пред пет години партијата испадна од коалициската влада со конзервативната Народна партија поради корупциски скандал.
Но сега, предводена од Херберт Кикл, партијата е на дофат на историска победа. Според предизборните анкети, крајнодесничарската партија е во тесно водство пред владејачка конзервативна Народна партија на канцеларот Карл Нехамер, а опозициските социјалдемократи се на трето место.
Се очекува дека ниту една партија нема да освои доволно места во парламентот за самостојно да има мнозинство, што ја отвора можноста за коалициски преговори. Формирањето коалиција веројатно ќе оди тешко, со оглед на тоа што канцеларот Нехамер во неколку наврати го отфрли повикот за приклучување кон влада предводена од Кикл.
Крајнодесничарската партија на Херберт Кикл успешно ги искористи загриженоста на граѓаните за миграцијата, зголемената инфлација, нестабилната економија, војната во Украина и гневот поради начинот на справување со пандемијата на ковид-19, со што повеќе од една година се задржа на првото место на предизборните анкети.
Како и другите екстремнодесничарски европски партии, ФПО комбинира остра реторика за имиграцијата и исламот со ветувања дека ќе го намали она што го смета за мешање во националните работи од страна на Брисел.
Право на учество на изборите за Националниот совет – Долниот дом на австрискиот парламент имаат 6 346 059 австриски граѓани на возраст над 16 години. Првичните резултати се очекуваат неколку минути по завршувањето на изборниот ден во 17 часот.