Оваа реакција е поттикната од апелот на ОН, хуманитарните и невладините организации ширум светот, како и Светската здравствена организација, дека во Газа има масовен глад
Итно мора да престане хуманитарната катастрофа во Појасот Газа, повикаа денеска во заедничко соопштение Париз, Лондон и Берлин, по состанокот кој го иницира британскиот премиер Кир Стармер.
„Хуманитарната катастрофа на која сме сведоци во Газа мора веднаш да престане“,
порачаа трите европски земји.
Оваа реакција е поттикната од апелот на ОН, хуманитарните и невладините организации ширум светот, како и Светската здравствена организација, дека во Газа има масовен глад.
Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.
„Дојде моментот да се стави крај на војната во Газа“,
додадоа тие и ги повикаа сите страни да го прекинат конфликтот со склучување договор за моментален прекин на огнот.
Трите европски земји, исто така, го повторија својот повик за ослободување на израелските заложници во Газа и за разоружување на Хамас. Тие додадоа дека цврсто се спротивставуваат на секој обид за наметнување на израелски суверенитет над окупираните палестински територии.
„Заканите за анексија, изградбата на израелски населби и актите на насилство извршени од израелските доселеници против Палестинците ги компромитираат изгледите за договорено решение кое предвидува коегзистенција со две држави“,
предупредија Франција, Германија и Велика Британија.