Папата Франциск се извини откако вчера на плоштадот Свети Петар удри верничка која грубо го повлече кон себе и не сакаше да го пушти.
„Сите често губиме трпение. Тоа ми се случува и мене. Се извинувам за лошиот пример даден вчера“,
вели папата во своето извинување што го пренесува агенцијата „Франс прес“.
Видеото од непријатната ситуација во која се најде тој бргу го обиколи светот и наиде на низа критики по социјалните мрежи, но и на многубројни коментари со разбирање за потегот на папата.
Додека папата се ракуваше и поздравуваше со децата, една жена го зграпчи за рака и грубо го повлече кон себе. Папата како да не знаеше што го снашло и, не можејќи поинаку, мораше на погруб начин да се ослободи од жената. Тој ја удри по рацете за да го пушти и да може да продолжи со поздравувањето.
Извинувањето од Ватикан доаѓа непосредно пред првата миса на папата Франциск за 2020 година на која тој го осуди насилството врз жените нарекувајќи го „навреда на Бога“.
„Жените се извор на живот. Но, непрекинато ги навредуваат, тепаат, изложуваат на насилство и присилуваат на проституција и прекинување на животите кои ги носат во себе“,
оцени поглаварот на Католичката црква.
Папата порача дека колку сме добри луѓе покажува и тоа како го третираме женското тело.
Видеото како папата ја удира по верничката можете да го погледнете ТУКА.