На прашањето зошто по убиството на Панче, не се повлекол и покајал, туку продолжил да учествува и во другото убиство, рече дека не можел бидејќи, како што рече, „премногу имав слушнато, и уште првиот пат кога ми кажа Вељо дека никој не смее да знае за ова, го зедов здраво за готово“
Денешното рочиште во Основниот кривичен суд Скопје за судскиот процес за грабнувањата и убиствата на 14-годишната Вања Ѓорчевска и велешанецот Панче Жежовски продолжи со сведочење на обвинетиот Влатко Кешишев. Тој одговараше на прашањата на првообвинетиот Љупчо Палевски.
Палевски седеше во задниот дел на судницата, а Кешишев на првата клупа и гледаше кон судијата.
Кешишев беше свртен со грб кон Палевски.
Испитувањето опфати прашања од страна на Палевски за закани, уцени, како и за хронолошка усогласеност со видеоснимките презентирани од Обвинителството, пренесува МИА.
Кешишев негираше какви било закани или уцени кон него, членови на партијата Десна или посетители од страна на Палевски, посочувајќи дека тој секогаш давал совети.
Тој одговори на повеќе прашања за доказите, вклучувајќи го и синиот ранец, што Палевски секогаш го носел со себе и за кој кажа дека се гледа на сите снимки и не може да го побие тоа.
На прашањата дали знае каде се пиштолот и „моторолите“, и зошто во врска тоа го споменувал синиот ранец, Кишишев рече дека претпоставува оти пиштолот бил во ранецот, зашто ако бил некаде во него (мислејќи на Палевски), ќе се познаел.
„Ако имаше пиштол до тебе, секако ќе се познаеше преку блузата“,
рече Кешишев.
Во однос на настаните во Демир Капија, рече дека најголем иницијатор за одењето бил Велибор Манев, кој тврдел дека таму има злато.
Прашан дали временската рамка на одењето и враќањето во Демир Капија одговара со снимките прикажани од ОЈО, Кешишев одговори потврдно.
Во однос на „мотролите“, Кешишев рече оти Палевски ги нарачал преку Фејсбук и негираше дека биле доставени до штабот во Кисела Вода.
Палевски го испитуваше Кешишев по однос на повеќе снимки и тоа дека не соодветствуваат со времето на настаните, при што додаде дека немал во него часовник или телефон и немал претстава за времето.
Кешишев сведочеше дека дупката каде што била закопана Вања била копана пред да се слушне истрелот. Тој изјави дека не слушнал глас од убиеното дете бидејќи бил на растојание од 20 метри. Не слушнал ниту разговор помеѓу обвинетиот и детето, туку само како стои над отворениот багажник.
Во врска со тоа што се зборувало околу убиството, тој одговори дека не слушнал спомнување на „Фершпед“, „А1“ или „стан во Охрид“.
За локацијата на настанот, Кешишев изјави дека тој ги упатил полицајците до местото Бразда.
Одговарајќи на прашања на Палевски, Кешишев потврди дека бил тепан во полиција и затвор.
„Да, тепан сум, двапати ме носеа во болница“,
рече тој.
Палевски му постави уште едно прашање:
„Што бараше од вас полицијата, зошто ве тепаше?“
На тоа, Кешишев одговори:
„Во затворот ништо не бараа, само ме тепаа и кога ме приведоа, таму со началникот, кога дојде тој прекинаа со тоа и почна со мене да разговара на тивок начин и ме замоли да кажам сѐ. Јас му реков, бидејќи имам грижа на совеста поради тоа што го видов за детето, ќе си кажам сѐ и со ќотек и без. Ќотекот продолжи во Шутка“.
На прашања од бранителот на Палевски, адвокат Јовица Страшевски, Кешишев негираше дека заедно со Велибор Манев ја копале дупката за Вања.
На прашањето дека трагите од лопатата не соодветствуваат со трагите од местото на настанот, односно дали тоа значи дека МВР не ја прибавило конкретната лопата, тој одговори дека полицијата ја земала лопатата пред него, а имало и друга лопата за која не знае кој ја зел.
Во однос на времето за убиството на Панче, одговори дека не го знае.
На прашањето зошто по убиството на Панче не се повлекол и покајал, туку продолжил да учествува и во другото убиство, рече дека не можел бидејќи, како што рече, „премногу имав слушнато, и уште првиот пат кога ми кажа Вељо дека никој не смее да знае за ова, го зедов здраво за готово“.
Расправата ќе продолжи в понеделник со прашања од Судот, а потоа со сведочење на обвинетиот Александар Ѓорчевски, по кој е предвидено да сведочи и Љупчо Палевски.
Во обвинението стои дека Љупчо Палевски, Боре Видевски, Велибор Манев, Влатко Кешишов и Александар Ѓорчевски, заедно испланирале грабнување на 14-годишната Вања со цел да присилат член на нејзиното потесно семејство да даде парични средства за откуп.
Грабнувањето на оштетениот Панче Жежовски во Велес, пак, според обвинението, било со намера да го присилат да им го даде сопственото возило „ситроен“ за да го користат за грабнување на детето во Скопје.
Малолетната Вања и велешанецот Панче, беа пријавени за исчезнати на 27 и 24 ноември, а на 3 декември 2023 година беа пронајдени мртви во близина на Скопје и Велес.