Бучков сведочеше дека негов поимотен пријател му помогнал на Палевски да ја доврши зградата „Тифани“ и дека му дал аванс од 15 илјади евра
„Се слушнавме од Белград, ми рече дека таму е отиден за кичмата и додаде дека му се јавил Влатко од партијата во Скопје и му кажал дека полицијата го барала зошто сакала да земе некое возило. Некој пикап. Ми кажа дека сакал да тргне за Македонија, но дека имал состаноци во Бугарија и во Турција“, рече Буков
Втор сведок на денешното рочиште за двојното убиство на 14-годишната Вања Ѓорчевска и 74-годишниот Панче Жежовски беше Ламбе Бучков, пријател на Љупчо Палевски-Палчо, со кого се познавале повеќе од 20 години.
Бучков во сведочењето изнесуваше детали за разговорите со Палевски и за неговите наредби со соработниците.
Сведокот, кој е поранешен вработен во Министерството за внатрешни работи, рече дека во времето кога биле блиски пријатели Палевски се занимавал со градежништво.
„Палчо знаеше дека имам пријател што е поимотен и бараше да му помогне да се доврши зградата ’Тифани’ што почнал да ја прави. Соработката почна успешно, зградата се заврши и функционира“,
рече Бучков.
Соработката, како што рече Бучков, продолжила понатаму кога Палевски ги понудил локациите во Центар што ги имал за ако сакал другарот да ги откупи и да продолжи да гради.
„Имаше договор, направивме идеен проект, му беше даден аванс од 15 илјади евра. По три поднесени барања во општината за добивање дозвола за градење немаше позитивен одговор. Баравме од Палчо да ги врати парите од авансот, но до денеска тоа не го направи“,
додаде Бучков.
„Кога контактирав со него“, рече Бучков, „ми кажа дека лицето што му ги носело трите илјади евра си ставило во џеб и на Палчо му дало само 12 илјади евра“.
Тој појасни дека Палевски никогаш не ги вратил парите, а тој зел кредит за да му ги врати на пријателот.
Бучков неколкупати неделно одел во седиштето на партијата за да ги бара парите
Од септември 2022 година секојдневно му ги барал парите и рече дека и по неколкупати неделно одел во седиштето на партијата каде што секогаш го гледал еден од обвинетите, Влатко Кешишов.
Палчо велел дека ќе ги врати средствата бидејќи чекал некои пари да му ги вратат, „но, тоа се одолговлекуваше бидејќи и него некој го лажел“.
„Имаше многу пари, но почна колата да оди надолу. Почнаа да му уриваат, мислам дека политичката елита“,
рече Бучков.
Палевски во Бугарија и Турција одел на состаноци
За контактите со Палевски во ноември 2023 година Бучков рече дека комуникацијата им се одвивала преку „Вибер“.
„Се слушнавме од Белград, ми рече дека таму е отиден за кичмата и додаде дека му се јавил Влатко од партијата во Скопје и му кажал дека полицијата го барала зошто сакала да земе некое возило. Некој пикап. Ми кажа дека сакал да тргне за Македонија, но дека имал состаноци во Бугарија и во Турција“,
рече Бучков.
Потоа рече дека му се јавил и од Турција и му кажал дека ќе се врати во понеделник и оти ќе се видат.
„Палевски ми кажа дека му рекол на Влатко Кекишов да им даде на инспекторите сè што ќе побараат, вклучително и возилото. За пикапот ми рече дека полицијата го бара оти било видено на местото каде што исчезнало некое девојче. Не препрашав за кое девојче се работи“,
изјави Бучков.
Освен за авансот што му бил даден од пријателот, Бучков кажа дека Палевски му должи 16 илјади евра и дека до денеска не му ги вратил.
„Сме си позајмувале пари, а 16 илјади евра сè уште ми должи за рекламите, за билборди“,
рече тој.
Во сведочењето Бучков кажа дека го познавал братот на Палевски со кого се видел кога Палчо бил во притвор во Турција.
„Брат му тврдеше дека не може Палчо да го направи тоа и оти може ќе ме викаат на суд како сведок. Ми рече да ја кажам вистината“,
рече Бучков.
Палевски, како што рече Бучков, му пратил писмо во кое напишал: „Ќе го викаат Лаки за сведок, нека каже сѐ што знае“.
„Мене ми е незгодно што сум повикан, мене Палчо само ми должи пари, а јас сум сведок во случај за убиство“,
додаде сведокот.
Знаев дека е љубител на убави марки пиштоли
Освен за контактите со Палчо, Бучков сведочеше и за поседувањето оружје.
„Познато ми е дека Палчо има не еден туку повеќе пиштоли. Знаев дека има, не сум видел. Знаев дека е љубител на убави марки пиштоли. Мислам дека имаше повеќе. Имаше дозвола за тоа оружје“,
рече Бучков.
Бучков нагласи дека по објавувањето на случајот доброволно се јавил во полиција.
„Јас се јавив во полиција и ги известив дека, доколку ги интересира нешто, можам да им го донесам Палчо. Но, никој од полицијата не ми се јави,“
објасни сведокот.
На крајот од сведочењето Бучков заврши со тврдењето дека е под постојан надзор.
„Шест месеци мене некој ме следи и ме прати, со камери, со базни станици“,
изјави тој.
На сведокот Бучков прашања му поставуваше и првообвинетиот Палевски.
„Рековте дека на Палевски му биле дадени пари за локации, договорот е заверен на нотар. Дали според тој договор требаше да му исплатите трипати по 100 илјади евра на Палевски?“,
праша Палевски.
На прашањето доби позитивен одговор од Бучков, по што следуваше ново прашање за тоа дали било постапено по тој договор.
„Не. Не знам што е ова битно. Аванс му беше даден на пријателот. Таксативно беше наведено со одобрение за градба 100 илјади евра, со карабина 100 илјади евра, а на крајот 100 илјади евра. Никогаш не добивме одобрение за градба и затоа не се дадени тие пари“,
рече Бучков.
На денешното рочиште прв сведок беше Ерол Османи кој рече дека со Палевски се познавале од времето кога тој издавал весник.
Потоа рече дека со Палчо останале пријатели и по затворањето на весникот, а дека во 2011-2012 година од него имал земено котел за греење и комуникацијата со него била секогаш кога доаѓала грејна сезона. Османи додаде дека последната комуникација со него ја имал на 28 ноември (еден ден по убиството на Вања), кога Палевски дошол кај него за да го поправи котелот.