Високи дипломати од Саудиска Арабија, Турција и Египет на крајот на март ќе допатуваат во Исламабад во обид да се постигне мировен договор до средината на април
Министерството за надворешни работи на Пакистан денеска соопшти дека земјата планира да биде домаќин на високи дипломатски претставници од Саудиска Арабија, Турција и Египет. Главната цел на овие средби, закажани за 29 и 30 март, е да се постигне деескалација на тензиите и ставање крај на војната на Блискиот Исток откако пакистанските власти потврдија дека служат како таен канал за комуникација меѓу Вашингтон и Техеран.
Според информациите, официјалните покани до колегите од овие држави веќе се испратени од страна на пакистанскиот вицепремиер и министер за надворешни работи, Исхак Дар.
Искористувајќи ја својата геостратешка позиција и границата од 900 километри што ја дели со Иран, Пакистан сериозно се позиционира како клучен медијатор во триаголникот меѓу Соединетите Американски Држави, Израел и Иран.
Дипломатски извори од Исламабад брифираат дека амбицијата на оваа иницијатива е да се издејствува конкретен мировен договор најдоцна до втората половина на април, а во пресрет на дипломатската офанзива, пакистанскиот премиер Шехбаз Шариф денеска остварил телефонски разговор со иранскиот претседател Масуд Пезешкијан.
За време на разговорот, Шариф изразил силна солидарност со Иран и остро ги осудил неодамнешните израелски напади врз иранската цивилна инфраструктура. Од своја страна, иранскиот претседател упатил благодарност за искрените напори на Пакистан за олеснување на дијалогот.