Претседателот на Словенија, Борут Пахор, денеска ја отфрли идејата за промена на границите на државите од поранешна СФРЈ и истакна дека го поддржува проширувањето на ЕУ кон Западен Балкан.
Пахор на прес-конференцијата рече дека не знае за нон-пејперот и дека за тоа не разговарал со премиерот Јанез Јанша.
„Ја бранам тезата дека би било најдобро ЕУ да одлучи да ги вклучи сите земји од Западен Балкан во Унијата“,
рече Пахор.
Тој оцени дека проширувањето на ЕУ станува прашање на време, а не само политичка волја.
„Бавното темпо на проширување ја топи довербата во европската перспектива во овие земји, а последиците може да бидат зајакнување на национализмот и зголемување на влијанието на третите земји“,
рече Пахор, пренесува словенечкиот портал „24“.
Тој истакна дека проширувањето ќе спречи појава на опасни идеи за промена на границите, на што, како што потенцираше, силно се спротивставува.
„Силно се спротивставувам на идејата за конечно распаѓање на Југославија и промена на границите“,
додаде словенечкиот претседател.
Според него, мирен процес на промена на границите на Западен Балкан не би бил можен и смета дека ова се многу чувствителни прашања.
„Брзиот процес на интеграција на земјите од Западен Балкан во евроатлантските организации ќе го зајакне принципот на територијалниот интегритет на земјите и безбедноста и стабилноста на цела Европа“,
рече Пахор.