„Ќе ги потсетам дека тие истите веќе имаа една таква декларација во Собранието, да не ги прифаќаат ултиматумите од Софија. Тие, за жал, прифатија сè“, кажа премиерот, коментирајќи ја изјавата на лидерот на опозицијата
На граѓаните и на Македонија им се потребни јасна политика и јасна визија на борба со аргументи. Нашата позиција како влада ја знаете. А тој тип итроштини ќе ги оставиме во минатото. Ова денеска од Кавадарци го рече премиерот Христијан Мицкоски, одговарајќи на новинарско прашање да даде коментар за синоќешната изјава на лидерот на опозицискиот Социјалдемократски сојуз (СДСМ), Венко Филипче за потпишување декларација во Собранието за евроитеграциите со нашите црвени линии, како и за прекинување на преговорите со Европската Унија доколку добиеме ново вето од Бугарија.
Во одговорот за новинарите, премиерот рече дека ја слушнал изјавата на Филипче, посочувајќи дека СДСМ и Демократската унија за интеграција (ДУИ) го потценуваат народот и играат на картата на кратка меморија.
„Ќе ги потсетам дека тие истите веќе имаа една таква декларација во Собранието, да не ги прифаќаат ултиматумите од Софија. Тие, за жал, прифатија сè“,
рече Мицкоски.
Посочи на минатото, кога имаше една декларација во парламентот за да нема промена на името на државата, за што додаде дека на крајот се случи.
„Знаете што правеше СДСМ кога дојде во Влада и што се случуваше кога се менуваше името на државата. Ќе ве потсетам дека прво рекоа дека ќе ги почитуваат резултатите од референдумот, па кога тој беше неуспешен, не ги почитуваа“,
кажа тој.
Според него, ова е работа што треба да ја водат сериозни луѓе со јасна визија и стратегија.
„Ова не е игра на итроштини. Видовме итреците со политика на итроштини седум години што им направија и на државата и на граѓаните. Видовме до каде стигнавме“,
рече премиерот.
Според него, остануваат само предавството, криминалот и неколкумина поранешни членови во Владата на СДСМ и ДУИ што се ултрамилионери, а граѓаните можат да видат со каков недвижен и движен имот располагаат тие во земјава и во странство.
Лидерот на СДСМ, Веенко Филипче, синоќа во телевизиско интервју рече дека Владата води неискрена политика во однос на евроинтеграциите и свесно го пролонгира процесот.
Предложи конкретен механизам за заштита на државните интереси.
„Ајде тогаш да донесеме заедничка резолуција во Собранието, во која ќе ги кажеме нашите црвени линии. Еве, ако се случи ново вето, да ги прекинеме преговорите со ЕУ“,
кажа тој.
Веднаш потоа рече дека младите гледаат застој во овој процес и тоа директно влијае на нивната одлука да ја напуштат државата.