„Нашата земја повторно победува. Всушност, победуваме толку многу што веќе не знаеме што да правиме со тоа. Луѓето ме молат: ве молам, ве молам, господине претседателе, премногу победуваме. Не можеме веќе да го издржиме тоа. Не сме навикнати да победуваме во нашата земја. Додека не дојдовте вие, ние само продолжувавме да губиме. Но, сега победуваме премногу“, кажа американскиот претседател во својот говор пред Конгресот, кој траеше час и 47 минути
Американскиот претседател Доналд Трамп во своето годишно обраќање до нацијата ги пофали економските достигнувања на Соединетите Американски Држави (САД), за кои рече дека земјата ја донеле до нејзината златна доба, а зборуваше и за односот со Венецуела и со Иран. Како што пренесуваат светските медиуми, тој во ниту еден момент не ја споменал аферата со сексуалниот престапник Џефри Епстин, во која, според досегашните информации, се вклучени бројни познати личности од различни сфери на општеството.
Трамп зборуваше пред Конгресот рекордни час и 47 минути, со што го надмина поранешниот претседател Бил Клинтон, кој во 2000 година зборуваше еден час и 20 минути, пренесува агенцијата Франс прес.
„Нашата нација се врати – поголема, подобра, побогата и посилна од кога било досега“,
го започна своето обраќање Трамп.
Потоа, рече дека ова е златната доба на Америка, фалејќи го она што го смета за достигнување на неговата администрација, од рекордни берзански индекси и ниски цени на горивата до спречување влез на фентанил на територијата на САД.
Трамп додаде и дека САД денес се почитувани во светот можеби како никогаш досега и оти победуваат толку многу што веќе не знаат што да прават со тоа.
Според Ројтерс, очигледно е дека Трамп ги послушал апелите на советниците кои биле загрижени дека дополнителниот пад на популарноста би можел да ги загрози веќе неизвесните избори за Конгресот во ноември, па затоа првиот час од своето обраќање тој го посветил на економијата.
Од претходниот претседател Џо Бајден, како што рече, наследил нација во криза, стагнирана економија со висока инфлација, земја со отворени граници, војни и хаос низ целиот свет.
Потенцира дека ја намалил инфлацијата, ги довел берзите на рекордни нивоа, вовел важни даночни олеснувања и ги намалил цените на лековите.
„Ова е трансформација каква што никој досега не видел. САД сега се почитувани во светот како можеби никогаш досега“,
рече тој.
Републиканците во Конгресот внимателно го следеа неговиот говор, често аплаудирајќи му, додека тоа не беше случај со демократите.
Трамп го коментираше односот на демократите, велејќи:
„Никој од нив не станува. Овие луѓе се луди. Ви велам, тие се луди.“
Повторно ги обвини демократите за изборна измама нагласувајќи дека ова всушност требаше да биде негов трет мандат, но се случуваат, како што додаде, чудни работи.
Потоа рече дека за време на неговиот мандат сите Американци напредуваат.
„За четири долги години, претходната администрација обезбеди помалку од еден трилион долари нови инвестиции во Соединетите Држави. И кога велам помалку, мислам значително помалку. За 12 месеци обезбедив обврски за повеќе од 18 трилиони долари што доаѓаат од целиот свет. Видете – многу помалку од еден трилион за четири години наспроти многу повеќе од 18 трилиони за една година. Каква разлика прави еден претседател. До неодамна бевме мртва земја. Сега сме најбараната земја во светот. Додека се градат илјадници нови фабрики, погони и лаборатории, отворивме 70 000 нови работни места во градежната индустрија. Никој не може да верува во тоа што го гледа.“
додаде Трамп.
Односите со Венецуела и со Иран
Тој, исто така, зборуваше за односот со Венецуела.
„Американското производство на нафта се зголеми за повеќе од 600 000 барели дневно. И штотуку добивме повеќе од 80 милиони барели нафта од нашиот нов пријател и партнер Венецуела. Американското производство на природен гас е на највисоко ниво во историјата затоа што го одржав ветувањето. Денес, повеќе Американци работат од кога било досега во историјата на нашата земја, а 100 отсто од сите работни места создадени за време на мојата администрација се во приватниот сектор“,
кажа тој.
Кога станува збор за Иран, Трамп рече дека сите карти сè уште се на маса, нагласувајќи го цврстиот став на Вашингтон дека Техеран никогаш не смее да поседува нуклеарен арсенал.
Според него, иранските власти покажуваат интерес за договорот, но сè уште не го изговориле клучното ветување за целосно откажување од нуклеарното оружје.
Американскиот претседател предупреди дека иранските ракети веќе претставуваат закана за Европа и американските бази, додека брзо се работи на ракети што би можеле да стигнат до самата американска територија.
Осврнувајќи се на воената акција во јуни, кога беа погодени три објекти, Трамп го повтори тврдењето за тотално уништување на нивната нуклеарна програма.
Сепак, тој истакна дека и покрај летните предупредувања, Техеран се обидува да го започне процесот од почеток.
Нашата земја повторно победува
На крајот, тој им рече на членовите на Конгресот дека состојбата на нивниот сојуз е силна поради сѐ она што го кажал досега.
„Нашата земја повторно победува. Всушност, победуваме толку многу што веќе не знаеме што да правиме со тоа. Луѓето ме молат: ве молам, ве молам, господине претседателе, премногу победуваме. Не можеме веќе да го издржиме тоа. Не сме навикнати да победуваме во нашата земја. Додека не дојдовте вие, ние само продолжувавме да губиме. Но, сега победуваме премногу“,
рече тој.
Трамп со воздржаност зборуваше на темата тарифи
Трамп, сепак, беше воздржан во врска со тоа што Врховниот суд во петокот го укина неговиот клучен царински режим. За разлика од претходните говори во кои ги навредуваше судиите на лична основа, сега претседателот се ракуваше со четворицата присутни судии при влегувањето во судницата, и само накратко ја нарече пресудата несреќна, најавувајќи дека ќе ги врати царинските давачки на друг начин.
Иако поголемиот дел од својот мандат го посвети на надворешната политика, таа тема доби малку внимание во првите 90 минути од говорот.
Едвај ја спомена војната во Украина, и покрај тоа што вчера се одбележа четвртата годишнина од руската инвазија.
Тој, исто така, не понуди појасни планови за Иран, поради растечките загрижености дека САД се приближуваат кон воен конфликт со Техеран.
„Сакам да го решам тој проблем преку дипломатија. Но, едно е сигурно, никогаш нема да дозволам водечкиот спонзор на тероризмот во светот да поседува нуклеарно оружје“,
рече тој.
Негодувања во салата додека траеше говорот
Сепак, Трамп во својот говор не го спомена Епстин, ниту документите за неговата афера.
Во еден момент неговиот говор беше прекинат, бидејќи присутните демократи го исвиркаа.
На темата за имиграцијата, Трамп ја повтори реториката од неговата кампања во 2024 година, тврдејќи дека недокументираните мигранти се одговорни за бранот насилни злосторства, и покрај истражувањата што го побиваат тоа.