Од Сојузот на борци од Тетово апелираат до државниот врв, дипломатскиот кор и особено до Владата веднаш да го осуети обидот за креирање немир и јавно да го осудат националистичкото сценарио во кое градоначалникот Билал Касами сака да го вовлече Тетово
Сојузот на борци од Тетово побара од локалниот совет и од Владата да не ја прифатат одлуката за определување име на улица, плоштад, мост и на друг инфраструктурен објект предложена од градоначалникот Биљал Касами. Тие во отворено писмо укажуваат дека се предлагаат имиња со кои се нарушува угледот на земјата и се навредуваат чувства на граѓаните.
„Ниту Советот ниту Владата не можат да се согласат со листа на која се предложени имиња на личности кои се дел од фашистичката коалиција од Втората светска војна, припадници на фашистичките балистички формации, на лица кои учествувале во војни и тероризам против безбедносните сили на Република Македонија или загрозиле јавна безбедност на наши или странски граѓани“,
пишува во отвореното писмо од Сојузот на борците од Тетово.
Од Сојузот на борците од Тетово укажуваат дека определувањето на имињата на улиците не смее да се користи како инструмент за политичко профитирање бидејќи со него се отвора на Пандорината кутија од која може да излезат големи непријатности за сите.
„Јавно апелираме до државниот врв, особено до Владата веднаш да го осуети овој срамен обид за креирање немир во Тетово, инициран и поттикнат од националистот Билал Касами. Јавно апелираме до сите политички партии, парламентарни и непарламентарни, веднаш јавно да го осудат сценариото во кое сака да нè вовлече Билал Касами. Јавно апелираме до амбасадите на ЕУ и на САД и до целиот дипломатски кор, да преземат дипломатска активност да се спречи националистичкото сценарио“,
се вели во отвореното писмо од Сојузот на борците од Тетово.
Општина Тетово има формирано работна група за именување и преименување улици, плоштади, паркови и некои инфраструктурни објекти. Во првата фаза е направен регистар на сите улици, по што треба да се распише јавен оглас за предлози со имиња, кои потоа треба да поминат во Советот и на владина седница. Во писмото Сојузот на борци од Тетово го потсетуваат Касами дека постапката што ја отпочнал е со закон забранета да се одвива во период од шест месеци пред одржувањето избори.