Помеѓу земјите потписнички на Договорот, С Македонија, Србија и Албанија, се разменети мониторинг планови за безбедност за храната и здравјето на животните
Започна примената на Договорот за соработка во областа на ветеринарството, безбедноста на храна и фитосанитарна политика кој беше потпишан помеѓу С.Македонија, Србија и Албанија, во рамки на иницијативата „Отворен Балкан“. Договорот предвидува поедноставување на царинските постапки и олеснување на транспортот на храна.
„Во насока на олеснување на трговијата меѓу трите држави и олеснување на протокот на добра меѓу Северна Македонија, Албанија и Србија, врз основа на Договорот, на граничните премини при увоз се врши само контрола на документацијата односно, идентификациски преглед на пратките, додека физичкиот преглед се врши на местото на истовар или на царински термнинал во внатрешноста“,
вели за МИА директорот на Агенцијата за храна и ветеринарство, Николче Бабовски.
Помеѓу земјите потписнички на Договорот се разменети мониторинг планови за безбедност за храната и здравјето на животните, со цел секоја земја да има увид во степенот на безбедност на храната и усогласеноста на националните законодавства со ЕУ легислативата во областите кои се предмет на Договорот.
„Договорот има за основа интензивирање на соработката базирана на воспоставени ЕУ стандарди и признавање на резултатите од спроведените лабораториски анализи со акредитирани методи како основа за олеснување на трговијата и развој на економиите во трите држави. Тој претставува база и реален вовед во активностите кои на ова поле треба да ги преземеме како држави во поглед на пристапувањето кон Европската Унија“,
објаснува Бабовски.
На иницијативата „Отворен Балкан“, која се одржа во декември минатата година беа потпишани неколку договори помеѓу С.Македонија, Србија и Албанија. Станува збор за договорот за условите за слободен пристап до пазарот на трудот на Западен Балкан, договорот за интерконекција за шемите за електронска идентификација на граѓаните на Западен Балкан и договорот за соработка во областа на ветеринарството, безбедноста на храна и фитосанитарната политика.
Според најавите, овие договори ќе обезбедат слободно минување на границите помеѓу С.Македонија, Србија и Албанија,. отворање можности за слободен проток на стока и капитал, како и обезбедување увоз-извоз и на земјоделски производи и жив добиток врз основа на реципроцитет.