Тој вели дека сите работи се расчистени и е распишан тендерот со тоа што овој пат нема да биде во две фази или во три фази како што беше претходно, туку Универзална сала ќе биде во една фаза, а тоа е клуч на рака
Изградбата на Универзална сала ќе биде во една фаза, за тоа се обезбедени 20 милиони евра и се очекува нејзино отворање до крајот на 2027 година, изјави денеска министерот за култура и туризам Зоран Љутков одговарајќи на новинарски прашања при посета на локалитетот Скупи.
Тој вели дека сите работи се расчистени и е распишан тендерот со тоа што овој пат нема да биде во две фази или во три фази како што беше претходно, туку Универзална сала ќе биде во една фаза, а тоа е клуч на рака.
„Во овој период добив насоки од Владата, значи побаравме мислења како треба да постапиме за да можеме да ги расчистиме сите правни недоследности, а верувајте ги имаше многу. И мислам дека резултираше на крај со една кривична пријава на претходната министерка“,
рече Љутков.
Тој додаде дека во претходниот проект не биле опфатени ниту последиците од опожарувањето ниту бил опфатен ентериерот и партерното уредување.
„Сега она што беше побарано и од Град Скопје да се исклучат комплетно од целиот овој процес, целиот товар да падне врз Министерство за култура и туризам, тоа го направивме, во соработка со Град Скопје, со Министерството за транспорт и во соработка со Општина Центар. Сите работи ги расчистивме се усогласивме законски и ја распишавме повеќегодишната јавна набавка“,
додаде Љутков.
Според Љутков, таа ќе биде финансирана некаде од 15 септември и ако биде се во ред со јавната набавка со градба ќе се почне и ќе биде финансирана 2025, 2026, 2027 година.
„Треба да заврши до крајот на годината и ќе останат уште одредени средства коишто ќе треба да се исплатат во 2028 година. Отворањето би требало да биде кон крајот на 2027, во зависност од динамиката на изведувачите“,
истакна Љутков.
Рече дека е помината и одлуката на Влада и обезбедени се средства во износ од околу 20 милиони евра до крајот на 2027 година.
„Сите комплетно ингеренции ги имаме преземено. Значи Министерство за култура и туризам сега е директно одговорно за изградбата на Универзална сала“,
додаде Љутков.