Александар Камбовски вели дека системот во моментот е така поставен што судии од одредени материи во граѓанското или кривичното право добиваат многу повеќе поени од оние што, на пример, работат на случаи од организиран криминал, а остануваат подолу на ранг-листите
Мене лично не ми се допаѓа овој начин, а сигурен сум дека и на 90 отсто од судиите не им се допаѓа бидејќи можеби петнаесет години на овој начин се вршат оценувањата и ние судиите петнаесет години сме алармирале дека не се фер и не се објективни – рече претседателот на Судскиот совет, Александар Камбовски, за методологијата и правилникот за оценување и рангирање на судиите на огласите за избор во повисок суд.
На пример, Марија Клетничка-Марковска, патем сопруга на Сашо Марковски, советник за надворешна политика на премиерот, неодамна беше избрана за судија на Апелацискиот суд Скопје, како прворангирана меѓу кандидатите, пред сè, поради ангажманот како претседателка на кривичниот совет во Основниот кривичен суд Скопје, што подразбира голем број предмети кои се решаваат во кратки рокови и за што се добиваат голем број поени при оценувањето.
Претседателот на Судскиот совет вели дека системот во моментот е така поставен што судии од одредени материи во граѓанското или кривичното право добиваат многу повеќе поени, како горенаведениот пример, за сметка на судии што работат на предмети од организиран криминал и кои се подолу на листите поради комплексноста на случаите, а за кои тој вели дека со ваквата поставеност на правилата, никогаш нема да можат да се пробијат меѓу прворангираните.
360°: Кој решава за тоа кој ќе биде претседател на кривичен совет?
Камбовски: Претседателот на судот.
360°: Доволно е претседателот на судот да реши вие да бидете претседател на кривичниот совет и на тој начин да ве фаворизира за утре да бидете унапреден?
Камбовски: Точно, затоа реков дека не ми се допаѓа овој начин, а сигурен сум дека и на 90 отсто од судиите не им се допаѓа. Ова е веќе, ајде да не кажувам грешна бројка, можеби петнаесет години се вршат на овој начин оценувањата и ние судиите петнаесет години сме реагирале дека не се фер, дека не се објективни.
360°: Претседателите на судовите имаат дискрециска можност да влијаат на унапредувањата на судиите?
Камбовски: Доколку некој претседател сака да го прави тоа, реално преку сегашната поставеност на нештата, може да го прави.
Апсурдот да биде поголем, судиите што се членови на кривичен совет (не претседатели) не добиваат ниеден поен во оценувањето по таа основа.
Затоа, вели Камбовски, во периодот што следува Судскиот совет треба да ги промени начинот на оценување и методологијата за процесот да биде пофер, потранспарентен и пообјективен.
„Колешката (Клетничка-Марковска, н.з.) можеби е прекрасен и квалитетен судија. И за нив, пак, не е фер, можеби таа е професионалец, но поради ваква опасност, некој да рече – тебе те фаворизирал претседателот или те ставиле на материја каде што можеш да добиваш многу поени, ниту тој судија не сака да е на овој начин оценет оти во старт му се руши авторитетот во смисла да излезе дека отишол во апелациски суд само поради тоа што работел лесни предмети“,
рече Камбовски.
Дополнително, претседателот на Судскиот совет вели дека е сигурен оти сите судии се согласуваат со него дека треба да се работи на промени и оти доколку има цврсто поставени и објективни критериуми, понатамошните разговори во јавноста во однос на тоа кој е чиј сопруг или сопруга ќе бидат излишни.
Во однос на унапредувањето на Цветанка Сиљановска-Костадиновска, која е сопруга на претседателот на Уставниот суд, во апелациска судијка, а за која се зборува дека се пробила на осмото место на ранг-листата поради тоа што има докторат, Камбовски вели дека е легитимно и оти тоа носи поени, но и дека овој критериум не би требало да биде пресуден во процесот на унапредување.
„Сето тоа ние треба да го наградуваме, во смисла дека завршил магистратура или докторат кој е од областа каде работи судијата, меѓутоа не да биде пресуден. Но, не може ни тоа тотално да го игнорираме, тој судија се трудел, читал, создавал трудови, не може да не дадете никакво признание“,
одговори претседателот на Судски совет.