Според мајка на загинато девојче во „Пулс“, со водење постапка против „неколку досегашни ситни функционери“ се создал привид на правда, со цел, како што рече, да се заташка целиот случај и да се избегне директна индивидуална и институционална одговорност
Родители на загинатите во пожарот во т.н. кабаре „Пулс“ во Кочани денеска излегоа на 34. по ред „Марш за ангелите“. Чекорејќи по веќе позната рута од „Паркот на револуцијата“ до зградата на судот и обвинителството во градот, тие за момент за задржаа за да ги упатат своите пораки, укажувајќи дека не се задоволни од начинот на кој надлежните ја водат постапката за утвдување на вистината за трагедијата.
Обраќајќи се пред јавноста, тие побараа проширување на истрагата, утврдување индивидуална одговорност и јавно образложение од надлежните, зоштои одредени лица досега не се опфатени со постапката.
Тие се осврнаа и на оставката на сега веќе поранешениот државен јавен обвинител, Љупчо Коцевски, а упатија и порака до тој што ќе го наследи на функцијата, со која бараат да се преиспита целокупниот предмет од почеток и, како што рекоа, да се утврди кој знаел, кој дозволил, кој премолчал и кој не постапил.
Александар Наунов, татко на починато девојче во „Пулс“ рече оти се гневни затоа што, како што кажа, постојат и други лица за кои и јавноста, а и тие како семејства, основано знаат дека сносат вина, но ниту се осомничени, ниту се предмет на видлива и транспаретна истрага.
„Нашите деца не се бројка. Тие имаат имиња. Имаат приказни. Имаат семејства што засекогаш ќе ги чекаат. Овој марш е порака: дека сме тука, дека паметиме, и дека нема да дозволиме вистината да се закопа заедно со нашите деца“,
рече Наунов пред полициската станица во Кочани.
Пред зградата на Судот и Обвинителството во Кочани, се обрати и Верица Трифунова, мајка на почината Моника Спасова, која говореше за оставката на Коцевски, за која рече дека била задоцнета, како и дека поранешниот државен јавен обвинител не покажал волја да го го отвори предметот од самиот ден на трагедијата.
„Државниот обвинител Коцевски поднесе неотповиклива оставка. Оставка што доаѓа предоцна. Затоа што немаше храброст и волја самостојно да го отвори предметот од денот на трагедијата. Наместо вистинска истрага, тој бараше информации од МВР, а постапките што следеа беа насочени кон лица осомничени уште од 2024 година и претходно, додека вистинските носители на моќ и одговорност останаа заштитени“,
кажа таа.
Според неа, со водење постапка против „неколку досегашни ситни функционери“ се создал привид на правда, со цел, како што рече, да се заташка целиот случај и да се избегне директна индивидуална и институционална одговорност.
„Ние родителите на убиените деца денес јавно и гласно порачуваме – оваа не е правда и ова нема да го прифатиме“,
рече Трифунова.
Таа упати порака до новиот државен јавен обвинител, што допрва треба да биде избран, да го преиспита целокупниот предмет од самиот почеток и на обвинителна клупа да се најде секој што директно или индиректно придонел за трагедијата во загинаа нивните деца.
„До новиот државен обвинител упатуваме јасна порака и задача – да се преиспита целокупниот предмет од самиот почеток, да се утврди кој знаел, кој дозволил, кој премолчал и кој не постапил. И на обвинителна клупа да се најде секој што директно или индитректно придонел за убиството на нашите деца“,
порача таа.
Протестниот марш, вообичаено, започна од „Паркот на Револуцијата“, преку Трговскиот центар и Управата за јавни приходи, кон полициската станица и Судот. На двојниот мост кај кружниот тек на улицата „Стево Теодосиевски“, запирајќи, родителите направија застој во сообраќајот, на што возачи реагираа со свирежи од нивните автомобили не знаејќи од кои причини е блокиран сообраќајот.
Инаку, во големата судница во Идризово во тек е судскиот процес против 35 физички и три правни лица, обвинети за трагедијата во Кочани, во која загинаа 63 лица, а повеќе од 200 беа повредени.
Судењето започна на 19 ноември и е во фаза на воведни зборови. Сите обвинети, меѓу кои сопственикот на т.н. кабаре „Пулс“ негови блиски, поранешни експектори во повеќе институции, како и поранешни министри се изјаснија дека не чувствуваат вина за трагедијата, а нивните бранители во воведните говори ги дадоа општите рамки во кои ќе се движи нивната одбрана.
Судењето треба да продолжи на 25 декември, кога воведни зборови треба да даде сопственикот на агенцијата за обезбедување „Рубикон секјурити солушнс“, Александар Нацев и претставниците на трите фирми, по што се очекува постапката да продолжи со сослушување сведоци.