Професорот Фергусон, кој го советуваше британскиот премиер да воведе мерки за карантин, сепак, ѝ дозволил на својата партнерка да го посетува во неговиот дом
Советникот на британската влада, епидемиологот Нил Фергусон, поднесе оставка откако ги прекрши правилата за изолација.
Професорот Фергусон, кој го советуваше британскиот премиер Борис Џонсон да воведе мерки за карантин и им „држеше предавање“ на граѓаните дека мора да ги почитуваат строгите мерки на социјална изолација, поднесе оставка на позицијата советник бидејќи ѝ дозволил на својата партнерка, која е мажена, да го посетува во неговиот дом, пишува британски „Телеграф“.
„Прифаќам дека направив грешка во мојата проценка и дека погрешно постапив. Затоа, поднесов оставка. Се однесував така со уверување дека сум имун, откако бев позитивен на тестот за коронавирус, по што целосно бев изолиран речиси две недели. Длабоко жалам за какво било поткопување на јасната порака дека физичката дистанца е постојано потребна за да се контролира оваа погубна епидемија. Владините насоки се недвосмислени и постојат за да нè заштитат сите нас,“
рече Фергусон.
Кон средината на март тој предупреди дека 250.000 луѓе би можеле да починат доколку Велика Британија не примени мерки за физичка дистанца меѓу луѓето, пренесува Скај њуз.