За време на претресот полицајците му ја предале и прочитале издадената наредба за претрес издадена од судија на претходна постапка при Судот во Гевгелија, а тој ја искинал
Основното јавно обвинителство (ОЈО) Гевгелија поведе истрага против лице осомничено за илегална трговија со дрога, како и за уништување на наредбата за спроведување на претрес во неговиот дом.
Изнесувајќи детали за настанот, од Обвинителството наведуваат дека осомничениот во својот дом во Гевгелија неовластено заради продажба држел 26,42 грама кокаин. Дрогата и повеќе други предмети со траги од кокаин биле пронајдени на 1 август при претрес во неговата јакна закачена во ходникот од семејната куќа.
За време на претресот полицајците на осомничениот му ја предале и прочитале издадената наредба за претрес издадена од судија на претходна постапка при Судот во Гевгелија.
„Наредбата примена во МВР и со службен печат на МВР, тој ја зел и ја искинал пред службените лица и на тој начин оштетил спис кој припаѓа на државен орган, односно наредба издадена од Основен суд Гевгелија и примена од ОВР Гевгелија“,
наведуваат од Обвинителството.
Надлежниот јавен обвинител до Судот достави предлог за определување мерка притвор за осомничениот.