На новинарско прашање дали поради името на клубот во Битола и реакциите во јавноста се нарушиле односите меѓу двете земји, Османи посочи дека е забележан пад на довербата, но истакна и дека е потребно што побргу да се работи на тоа таа да се врати
Кога ќе влезете во бугарскиот клуб во Битола, на главниот влез има голема табла со цитат од Ванчо Михајлов, на која пишува: „Залудни се напорите на таканаречениот македонски народ да го лаже светот“. Ова е голема навреда за нашите граѓани, ова е голема навреда за луѓето што ги застапувам. Ова кај нас се смета за провокација, изјави министерот за надворешни работи Бујар Османи во интервју за бугарската телевизија БТВ одговарајќи на прашање во однос на тензиите што се појавија меѓу двете земји по отворањето на клубот „Ванчо Михајлов“ во Битола.
Османи вели дека не верува дека бугарските власти биле присутни во Битола поради оваа порака на Михајлов, но посочи и дека доколку клубот не го носел ова име, државниот врв на Северна Македонија ќе присуствувал во Битола.
„И јас во мојата изјава кажав дека доколку клубот не го носеше ова име ние ќе бевме дел од оваа делегација во Битола. Целата наша влада би била таму бидејќи ја поздравуваме и сакаме да ја поттикнеме бугарската заедница да се организира, сакаме бугарската заедница да се интегрира во институциите, системите и механизмите создадени преку рамковниот договор. Но, мораме да внимаваме на чувствителноста на темите, особено во овој период на доверба. Сакаме да ја вратиме меѓусебната доверба. Секако дека ваквите прашања ќе ни бидат се помалку важни, бидејќи ќе бидеме фокусирани на иднината, на заедничката европска перспектива за граѓаните на двете земји. Но, ова е деликатен период во кој и вие и ние мораме да бидеме внимателни за да ја создадеме нашата заедничка иднина“,
смета Османи.
На новинарско прашање дали поради името на клубот во Битола и реакциите во јавноста се нарушиле односите меѓу двете земји, Османи посочи дека е забележан пад на довербата, но истакна и дека е потребно што побргу да се работи на тоа таа да се врати бидејќи, како што вели, граѓаните тоа го очекуваат.
„За жал, можеме да кажеме дека тоа придонесе за пад на довербата меѓу двете земји, која ја градевме во овие шест месеци. Знаете дека работните групи се состануваат секоја недела. Целата влада на Република Северна Македонија беше фокусирана на едно прашање – односите со Република Бугарија. Министрите за економија и министерот за животна средина и просторно планирање почесто се среќаваат со своите колеги од Бугарија отколку со кои било колеги од нашата Влада. И тоа навистина беше наша желба – да инвестираме во градење доверба, да го смениме правецот, да излеземе од овој токсичен циклус на односи што траеше со години меѓу нашите земји. И конечно се случи она што се случи. Но, ќе мораме да го надминеме, тоа е причината што јас сум повторно во Софија. Треба да ја вратиме комуникацијата, треба да ја вратиме довербата – ова е наша должност како политичари. Ова го очекуваат нашите граѓани од нас – понекогаш да си ги голтнеме емоциите за да донесеме одредени одлуки за иднината на нашите граѓани“,
истакна Османи.