Шефот на дипломатијата ова го изјави на заедничката прес-конференција со австрискиот министер за европски и меѓународни прашања, образование и човечки ресурси на покраината Штаерска, Вернер Амон, кој, пак, оцени дека безбедносната состојба во сите европски држави е напната и дека е зголемен степенот на безбедност
Засега нема конкретни закани, но надлежните институции ја следат безбедносната состојба во земјава, изјави денеска министерот за надворешни работи Бујар Османи, говорејќи за подигнувањето на нивото на безбедност во европските држави, кое следува по ескалацијата на конфликтот на Блискиот Исток.
„Во однос на состојбата во Северна Македонија, тоа е надлежност на домашните служби, постојано сме известени за зголемувањето на сензитивноста без конкретни закани, но исто така сме во постојана координација и ги следиме состојбите преку надворешно политичката комуникација и преку внатрешната комуникација“,
рече Османи, одговарајќи на новинарски прашања по прес-конференција со австрискиот покраински министер за европски и меѓународни прашања, образование и човечки ресурси на Штаерска, Вернер Амон.
Шефот на дипломатијата ова го изјави на заедничката прес-конференција со австрискиот министер за европски и меѓународни прашања, образование и човечки ресурси на покраината Штаерска, Вернер Амон, кој денеска беше во посета на земјава.
Австрискиот покраински министер оцени дека поради конфликтот на Блискиот Исток безбедносната состојба во сите европски држави е напната и дека е зголемен степенот на безбедност.
„Поради сè што се случува, треба да создадеме повеќе безбедност. Безбедносната состојба е напната во сите европски држави и го имаме зголемено нашиот степен на безбедност. Ќе мора да се обезбедат соодветни мерки“,
рече австрискиот покраински министер Вернер Амон.
Поради неодамнешната ескалација на конфликтот на Блискиот Исток и по терористичкиот напад во Брисел, властите на Австрија одлучија да го подигнат нивото на предупредување за заканата од тероризам. Австрискиот министер за внатрешни работи објасни дека предупредувањето за тероризам е подигнато на т.н. „портокалово ниво“, односно втор највисок степен на безбедност
Италија, пак, одлучи да ги врати граничните контроли со Словенија, оценувајќи ги како неопходни поради конфликтот на Блискиот Исток, зголемените миграциски текови, но пред сè поради националната безбедност.