Министерот за надворешни работи, Бујар Османи, во интервју за „ЕУ опсервер“ вели дека се надева оти Скопје и Софија сега ќе ја насочат енергијата за решавање на спорот, по изборите во Бугарија во неделата.
„Во интерес е на Бугарија регионот да успее“,
вели тој.
Османи за „ЕУ опсервер“ во врска со ситуацијата во Босна и Херцеговина, оценува дека настаните од 90-тите години нема да се повторат во регионот.
„Не сме во фаза кога ова може да се претвори во војна или конфликт“,
рече тој, посочувајќи го присуството на НАТО.
Османи истакна дека НАТО и зрелоста на регионот, должејќи се во еден дел на европската перспектива, е гарант за стабилноста.
„НАТО е гарант за политичката предвидливост, стабилноста и безбедноста. Тоа е горивото што го прави моторот да се движи“,
додаде Османи.
Шефот на дипломатијата посочува дека решавањето на прашањето за пристапување во ЕУ со Северна Македонија и Албанија исто така ќе поттикне Србија и Косово „да го следат патот на помирувањето“.
„Со тоа го отворате патот и за решавање на прашањето на БиХ“,
вели Османи, додавајќи дека судбината на регионот на некој начин зависи од отворањето на меѓувладините конференции со ЕУ.
„ЕУ опсервер“ додава дека високиот претставник за надворешна и безбедносна политика Жосеп Борел даде слична изјава во понеделникот на средбата со шефовите на дипломатиите на ЕУ, истакнувајќи дека меѓувладините конференции со Северна Македонија и Албанија треба да се одржат што е можно поскоро, до крајот на годината.
„Доколку тоа не се случи, ќе има негативно влијание врз кредибилноста на Унијата и на целиот регион“,
рече тогаш Борел.
Изданието потсетува дека со години се одложува почетокот на отворање преговори, што доведе до фрустрации во земјата. Европската комисија, додава „ЕУ опсервер“ посочи дека ова одложување ја загрозува поддршката на ЕУ за регионот и отвора пат за можно руско или кинеско влијание.