Не сме толку врзани со датумот колку со потребата Бугарија да го подигне ветото, а за тоа треба период за преговори со цел да се надминат отворените прашања, вели шефот на дипломатијата
Министерот за надворешни работи, Бујар Османи, се уште верува дека до 14 декември е можна деблокада на евроинтеграцискиот процес на Северна Македонија. Сепак, признава дека постои „временски теснец“ поради штотуку завршените парламентарни и се уште незаокружените претседателски избори во Бугарија.
Во вечерашното интервју во емисијата „360 степени“ на ТВ Алсат, Османи рече дека очекува што поскоро да се формира политичка Влада во Бугарија, па да се бара компромис за отворените прашања.
„Мислам дека влегуваме во некакво финале во оваа сага на разговори и на обиди за почеток на преговори. 14 декември е следната средба на Советот за општи работи на ЕУ, каде може да се донесе одлука, но не значи дека ако до 31 декември има одлука од Бугарија дека не може да се свика вонреден состанок, па дури и онлајн, во кое било време. Што значи, не сме толку врзани со датумот, колку со потребата за Бугарија да го подигне ветото, а за тоа треба период за преговори со цел да се надминат прашањата што се предвидени во пакет од пет точки. Се е сведено сега на предвидливост во Бугарија, од понеделник ќе имаме избран претседател, па парламентот некаде на 24 ќе се конституира, што значи две важни институции ќе има со целосен мандат. Се надеваме дека брзо ќе има и политичка влада и тогаш ќе можеме суштински да седнеме да ги разгледаме, иако веќе ние ги разгледуваме овие точки во четири рунди разговори. Не дека почнуваме од почеток“,
вели Османи.
На прашањето што ги „издиша“ надежите дека деблокдата ќе се случи уште на 14 декември, Османи вели дека тоа е временскиот теснец за можноста за формирање влада во Бугарија.
„Ние уште се надеваме на 14 декември, доколку брзо се формира влада во Бугарија. Мислам дека во тие две недели може да седнеме и да ги разговараме овие прашања, бидејќи ние веќе разговараме цела година и доколку има добра волја, мислам дека може да се надминат и да се донесе одлука Бугарија да ја поддржи Преговарачката рамка, а со тоа и одржувањето на Меѓувладината конференција. Во Брисел се е спремно. Доколку на 14 декември се даде ’зелено светло’ од Бугарија, веќе попладнето е спремно одржување на првата Меѓувладината конференција. 26 земји се одлучни дека мора сега. Не би се ограничувал временски, бидејќи секој ден е можност за донесување одлука доколку има политичка одлука во Бугарија“,
вели Османи.