Министерот Османи присуствуваше на денешната панел дискусија на тема: „Новите геополитички случувања и влијанието врз Северна Македонија” која се одржа на Универзитетот на Југоисточна Европа во Тетово, во организација на Институтот за европска политика
Постои итна потреба од свеж моментум во интеграцијата на Западниот Балкан во ЕУ, за што двете страни треба да постигнат конкретен напредок: Европската Унија да обезбеди повеќе практични придобивки и опипливи резултати кои произлегуваат од процесот на пристапување, а земјите од регионот на Западен Балкан да преземат конкретни и вистински активности во спроведувањето на националните реформски планови и усвојувањето на стандардите на ЕУ, истакна министерот за надворешни работи Бујар Османи на денешната панел дискусија на тема: „Новите геополитички случувања и влијанието врз Северна Македонија” која се одржа на Универзитетот на Југоисточна Европа во Тетово, во организација на Институтот за европска политика.
Во однос на спроведувањето на реформските процеси во рамки на процесот на пристапувањето во ЕУ, како и оние во рамки на Стратешкиот дијалог, Османи подвлече дека се работи за комплементарни процеси кои ќе ја направат Северна Македонија држава со повисок демократски капацитет, со многу поголема доверба во правосудниот систем и со многу помал степен на корупција, во однос на сегашната состојба.
Министерот за надворешни работи дискутираше и за главните придобивки за Северна Македонија од претседавањето со ОБСЕ и како може да се искористи тоа за подобрување на меѓународниот углед на земјава.
„Она што е ново и што се случува за првпат во историјата, е министерот на нашата земја да се ангажира, како Претседавач со ОБСЕ, со решавање на безбедносните проблеми и предизвици на другите. Таа наша акција и тоа наше воздигање од корисник до контрибутор на безбедноста се гледа и се препознава. Ние, како Претседавач со ОБСЕ, нема да ги решиме проблемите на светот. Но, со нашето искуство во решавањето на сопствените предизвици, со нашата енергија и посветеност, со приврзаноста на принципите и заложбите, можеме да придонесеме за генерирање на попозитивен дух, зајакнување на дијалогот во ОБСЕ просторот, но и да им помогнеме, преку засилен ангажман на теренските мисии, на оние кои најмногу страдаат во конфликтите: обичните луѓе“,
посочи Османи.
Во фокусот на денешната дебата беа геополитичките предизвици предизвикани со војната во Украина и во овој контекст позиционираноста на Северна Македонија, нашиот европски пат, претседавањето со ОБСЕ и можностите за искористување на Стратешкиот дијалог со САД за реформскиот процес во државата.
Настанот е организиран во рамките на проектот „Поттикнување анализа на политики и јавна дебата“. Проектот е имплементиран од Институтот за европска политика – Скопје во соработка со Центарот за делиберативна демократија на Универзитетот Стенфорд во САД и е финансиран од Националната фондација за демократија (National Endowment for Democracy).